د سيم کارتونو د راجسترېشن په طرزالعمل بحث وشو
د مخابراتو او مالوماتي ټيکنالوژۍ د سرپرست وزير انجينر سيد احمد شاه سادات په مشرۍ د په ټول هېواد کې د سيم کارتونو د ثبتولو په کړنلاره بحث وشو. لومړی د طرزالعمل ټولې مادې تر بحث لاندې ونيول شوې. د تخنيکي او حقوقي سلاکارانو نظرونه واورېدل شو او لازمې لارښوونې ورته وشوې. د دغه کړنلارې په نهايي کېدو به په ټول هېواد کې د ټولو مخابراتي شبکو د سيم کارتونو ثبت پيل او د کاروونکو هويت به يې مالوم وي. د دې طرزالعمل په پلي کېدو سره به مخابراتي شرکتونه مکلف وي چې بازار ته يواځې غير فعال سيم کارتونه وړاندې کړي، چې د مالومو او جواز لرونکو نمايندګيو لخوا د ثبت وروسته به فعاليت کوي.
د يادونې وړ ده چې د سيم کارتونو په راجسترېشن سره به د جرمونو کچه ټيټه، امنيت بهتر، اړيکې مصونې او عايدات زيات شي.
