د روشن مخابراتي شرکت (الفا پرایم) په نوم نوی محصول وړاندې کړ
د روشن مخابراتي شرکت د ننګرهار مرکز جلال آباد ښار کې د (الفا پرایم) په نوم نوی محصول د رسمي مراسمو په ترڅ کې پرانیست.
په دغو مراسمو کې د ننګرهار ولايت مرستيال والي صاحب، د مخابراتو او معلوماتي ټکنالوجۍ ریاست رئيس، د مخابراتي خدمتونو د تنظیم ادارې (اترا) ختیځ زون اداري آمر، د روشن مخابراتي شرکت د ختيځ زون مسئول او له کابل څخه ورغلي پلاوي، يو شمير دولتي او غير دولتي ادارو مسئولينو ګډون کړی و.
په یاده غونډه کې د ننګرهار ولایت مرستيال والي د مخابراتي سکتور د اهميت په اړه يی خبرې وکړې او يادونه يی وکړه چې اوسنې عصر کې ټکنالوجي ډير پر مختګ کړی او دې برخی ته بايد خاصه توجه وشي .
د ننګرهار ولایت د مخابراتو او معلوماتي ټکنالوجۍ رئيس په خپلو خبرو کې د روشن مخابراتي شرکت د دغه اقدام ستاينه وکړه او په نورو شرکتونو يی هم غږ وکړ چې ورته اقدام ترسره کړي ترڅنګ يی د ټي ډی اف لسمې پروژې سايټونو د چارو د پرمختګ، شرکتونو ترمنځ سالم رقابت او یو شمير نورو موضوعاتو په اړه معلومات وړاندې کړل .
همداراز د غير قانوني سيمکارتونو کنټرول، د نوري فايبر FTTH او ټي ډی اف لسمې پروژو پر اهميت خبرې وشوې او ټولو مخابراتي شرکتونو ته سپارښتنه وشوه چې د مخابراتي خدمتونو کيفيت لوړ او د پوښښ ساحه پراخه کړي.
د یادونې وړ ده چې د روشن مخابراتي شرکت د ختيځ زون مسئول د الفا پرايم په اړه ګډونوالو ته تفصيلې معلومات وړاندې ورکړل.
