د جغرافيايي مالوماتي سستم GIS پاليسي جوړه شوه
د مخابراتو او مالوماتي ټيکنالوجۍ وزارت لخوا نن د اسيايي پراختيايي بانک او ماليې وزارت په همکارۍ د افغانستان د جغرافيايي مالوماتي سستم GIS لپاره پاليسي جوړه او له اړوند وزارتونو او ارګانونو سره شريکه شوه. په دې اړه د اسيايي پراختيايي بانک په همکارۍ يو ورځنی ورکشاپ ترسره شو، چې د مخابراتو او مالوماتي ټيکنالوجۍ د سرپرست وزير شهزاد اريوبي تر څنګ په مالوماتي ټيکنالوجۍ کې د ولسمشر سلاکار ښاغلي رفيع الدين ملکزي، د مختلفو وزارتونو معينانو او رئيسانو ګډون کړی و.
سرپرست وزير د جغرافيايي مالوماتي سستم پاليسي يوه لويه لاسته راوړنه وبلله او دا يې د متوازن پرمختګ لپاره مهم ګام وباله. د جغرافيايي مالوماتي سستم څخه په سترو او کوچنيو انکشافي پروژو، کرنې، د مخدره موادو په کنټرول، مخابراتي پوښښ، مواصلاتو او نورو برخو کې ګټه اخيستلی شي. د دغې پاليسۍ په تطبيق سره به د جغرافيايي مالوماتو د را ټولولو، کره کتنې، شريکولو، مصونيت او ساتنې په اړه همغږي رامنځته شي.
