د ایران د مخابراتو او معلوماتي ټکنالوجۍ وزیر سره د دوه اړخيزه همکاريو په اړه خبرې
جمعه ۱۳۹۷/۸/۱۱ - ۱۹:۳۰
د افغانستان د مخابراتو او معلوماتي ټکنالوجۍ وزیر محترم شهزاد آريوبي، د مخابراتو د نړېوالې اتحاديې د کنفرانس په څنده کې د ایران د مخابراتو او معلوماتي ټکنالوجۍ وزیر محترم محمد جواد آذری جهرمی سره ولیدل او د مخابراتو او معلوماتي ټکنالوجۍ د دوه اړخيزه همکاريو په اړه يې خبرې وکړې.
محترم آريوبي په دغه ناسته کې د خپل ایراني سيال سره د سيمه ييز اتصال په موخه د چابهار بندر له لارې د ایران او له هغې لارې د بحري کيبل( سبمرین کیبل) سره د افغانستان اتصال او همدا راز د معلوماتي ټکنالوجۍ په برخه کې د ایران او افغانستان تر منځ د دوه اړخیزه هوکړه لیک د عملي کېدلو په موادو خبرې او هوکړه وکړه.
دغه راز د ایران د مخابراتو او معلوماتي ټکنالوجۍ وزیر د افغانستان سره په بېلابېلو برخو کې د همکارۍ ژمنه وکړه او د افغانستان څخه يې د آی ټي يو د کونسل د ټاکنو په برخه کې د همکارۍ غوښتنه وکړه.
ددې تر څنګ يې د افغانستان د مخابراتو او معلوماتي ټکنالوجۍ له وزیر، محترم شهزاد آريوبي څخه ددغه هېواد د معلوماتي ټکنالوجۍ او آی سی ټي د زیربناوو د لیدنې په موخه د رسمي سفر غوښتنه هم وکړه.
