بلخ ولایت کې د پوستي خدمتونو له فعالیتونو څخه څارنه تر سره شوه
د مخابراتو او معلوماتي ټکنالوجۍ وزارت د لارښوونې سره سم، د بلخ ولایت په مرکز مزارشریف ښارکې د دولتي او خصوصي پوسټي شرکتونو فعالیتونه د مخابراتو او معلوماتي ټکنالوجۍ وزارت د پوسټي خدمتونو تنظیم ادارې (اپرا) ریاست له لوري د نوموړي ولایت د مخابراتو ریاست سره په همغږۍ په یاد ولایت کې د غیرقانوني پوسټي خدمتونو د مخنیوي په موخه څارنه تر سره کړه.
د دې څارنې په ترڅ کې له ۱۵ هغو شرکتونو څخه چې له جواز پرته یې پوسټي او کارګو خدمتونه وړاندې کول، لیکلي ژمنه ؤاخیستل شؤه او د پوسټي او کارګو خدمتونو ټولو شرکتونو ته لارښوونه وشوه چې خپلې ټولې چارې د اپرا ادارې د کړنلارې له مخې د اړوندو شرکتونو د اصولو او اساسنامې سره سم ترسره کړي، د سرغړونې په صورت کې به ورسره قانوني چلند وشي.
همدا راز د دې څارنې ترڅنګ د پوسټي خدمتونو د تنظیم ادارې (اپرا) ریاست د پلاوي لخوا یو پریزینټیشن هم وړاندې شو چې د یادو شرکتونو استازو او د بلخ ولایت د مخابراتو ریاست کارکوونکو ته د پوسټي او کارګو خدمتونو د کاري مسیر په اړه د پوهاوي لپاره معلومات ورکړل شول.
دا څارنه د غیر قانونی پوسټي فعالیتونو د مخنیوي، د کارګو شرکتونو د کاري تفکيک په اړه د پوهاوي, او همدارنګه د دولتي عوایدو د ډیروالي په موخه ترسره شوه.
