بغلان ولایت د مخابراتو او معلوماتي ټکنالوجۍ ریاست او مخابراتي شرکتونو مسئولینو تر منځ د همغږۍ غونډه وشوه
د بغلان ولایت د مخابراتو او معلوماتي ټکنالوجۍ ریاست او دیوشمیر خصوصي مخابراتي شرکتونو مسؤلینو ترمنځ د همغږۍ غونډه ترسره شوه.
په دې غونډې کې د مخابراتي خدمتونو د کیفیت لا ښه والي، د مخابراتو او معلوماتي ټکنالوجۍ وزارت د اټرا ادارې د کړنلارې په اساس د سیمکارتونو خرڅلاو او ثبت، په جبري ډول د کریدیټ کارت له پلورڅخه مخنیوی، د وسایلو ثبت، د فریکونسۍ د جواز اخیستل، د ټاورونو دثبت فورم اخیستل او د خلکو د مخابراتي او انټرنیټی ستونزو د حل په تړاو بحث وشو.
دغې ناسته کې اړونده شرکتونو ته د سپارښتنو تر څنګ ټینګار ؤشو چې ټول مخابراتي شرکتونه باید د طرزالعمل او قوانینو مطابق چارې مدیریت کړي .
په بغلان ولایت کې د مخابراتي شرکتونو مسؤلینو هم ډاډ څرګند کړ چې ټول قانوني موارد په نظر کې نیسي او د کړنلارې مطابق خپلې چارې مخې ته بیایي.
