انالوګ څخه ډیجیټل سیستم ته د تلویزیون بدلولو په اړه د نظر غوښتنې دریمه غونډه جوړه شوه

نن د پنج شنبې ورځ د ۱۳۹۱ کال د کب د میشتی په ۱۷ نیټه د انالوګ تلویزیونی سیستم څخه ډیجیټل ته د بدلون په اړه د نظر غوښتنې دریمه ناسته د مخابراتو او معلوماتی تکنالوجۍ وزیر ښاغلی انجنیر امیرزی سنګین په ګډون د تلویزیونونو مسوولینو او تخنیکرانو سره جوړه شوه. 

د غونډې په پیل کې ښاغلی امیرزی سنګین د مخابراتو په سکتور کې مخابراتو او معلوماتی ټکنالوجۍ وزارت د نه ستړی کیدونکی هڅو، پر مختګونو او  د لاسته راوړنو په اړوند لنډ معلومات وړاندې کړل او ویې ویل: چې افغانستان د نړئ په سطح کې یواځینۍ هیواد دی چی د مخابراتو او معلوماتی ټکنالوجئ  په برخه کې  ډیره کمه موده کې چټک او  د پام وړ  پرمختګ ته رسیدلی دی.

ښاغلۍ سنګین زیاته کړه چې د دغې غونډې موخه د مخابراتو په سکتور کې د پرمختګونو دوام او د هیواد تصویری خپرندویه موسساتو کې د نوی او پر مخ تللی ټکنالوجئ   څخه د ګټه اخیستنې د څرنګوالی او کارولو لارې چارې په هکله د نظریاتو تبادله او تجربو شریکول دی.

د مخابراتو وزیر ښاغلی سنګین د ډیجیټل سیستم  د ارزښت په اړه و ویل : ډیجیټل سیستم نه یواځې د مخابراتو او تلویزیونی خپرونو د کیفیت لوړولو او پوښښ سیمې د پراخولو په برخه کې اړین دی بلکه د ژوند په بیلا بیلو اقتصادی، ټولنیز، تکنالوجۍ، معلوماتی او نورو برخو کې مهم رول لوبوی .

وروسته د غونډې ګډونوال د موضوع په هکله په مفصله توګه خبرې وکړې او خپل نظریات او تجربې یې سره شریکې کړې. همدا رنګه د ډیجیټل سیستم ته د انالوګ بدلولو د بهیر  په هکله هم خپل نظر یې مطرح کړل او وړاندیز یې وکړ چې دا بهیر دې په اوږد مهال کې تر سره شی او په هغه کې برخه اخیستنه باید چې اختیاری وی.

په پای کې د بحث او رایو د تبادلې وروسته ټول ګډونوال د داسې مشورتی غونډو جوړل یې د مخابراتو وزارت نوئ نوښت اواړین  وبلل  او په راتلونکی کې یې پر  دوام  ټینګار وکړل.