د بریښنایي حکومتولۍ سره روڼتیا او حساب ورکول: په لغمان ولایت کې د دولتي کارمندانو د حاضری سیستم بریښنایي کیږي
د لغمان ولایت اونیزه اداري ناسته د دې ولایت والي عبدالولي واحدزي په مشررۍ او د ولایت مرستیال او د ادارو رییسانو او مسئولینو په ګډون جوړه شوه.
د لغمان ولایت د مخابراتو او معلوماتي ټکنالوجۍ رییس محمد همایون شمس د معلوماتي ټکنالوجۍ د خدمتونو د څرنګوالي، د ډیجیټلي خدمتونو اوسنی وضعیت، د ۱۴۰۰ مالي کال د لومړیو شپږو میاشتو لاسته راوړنو، راتلونکي پلانونو، د دې سکتور په وړاندې ستونزو او ننګونو او حل لارو په اړه هر اړخیز معلومات وړاندې کړل.
د لغمان ولایت والي عبدالولي واحدزي د اداري چارو په ګړندي کولو باندې په ټینګار سره د ټولو ادارو مسئولینو ته لارښوونه وکړه چې د مخابراتو او معلوماتي ټکنالوجۍ په همکارۍ د کارکوونکو د حاضرۍ سیستم دې د ۱۵ ورځو په لړ کې بریښنایي کړي او په راتلونکي غونډه کې دې د خپلو اجرااتو راپور وړاندې کړي.
