د مدني ټولنو د استازو لخوا د مخابراتو او مالوماتي ټيکنالوجۍ سرپرست وزير ته (د کار سړي) ستاينليک ورکړل شو.
د مخابراتو او مالوماتي ټيکنالوجۍ سرپرست وزير انجينر سيد احمد شاه سادات ته نن د شهامت، مشال او جهش مدني ټولنو لخوا "د کار سړی" ستاينليک ورکړل شو. په دغه ناسته کې د سياسي چارو کارپوه او ليکوال ښاغلي غفور جاوېد، د شهامت مدني ټولنې مشر ښاغلي فريد سيلاني، د مشال مدني ټولنې مشر هارون فورمولي، د ښځينه مدني فعالانو په استازيتوب اغلې تمنا جهش او ګڼ شمېر مدني فعالانو ګډون کړی و.
سرپرست وزير د مدني فعالانو د استازو وړانديزونه، په مخابراتي سکتور کې د خلکو ستونزې او د ښې حکومتولۍ په برخه کې د مدني ټولنو د لاسته راوړنو په اړه د دوی خبرې واورېدي. د مدني فعالانو په ځواب کې ښاغلي سيد احمد شاه سادات د اصلاحاتو په راوستو کې د وزارت د رهبرۍ د کلک هوډ، د ښې حکومتولۍ په برخه کې د وزارت په لاسته راوړنو، راتلونکو پرمختيايي پلانونو، د فساد سره د مبارزې او د مدني ټولنو په دوامداره نظارت تاکيد وکړ. سرپرست وزير د مدني ټولنو له راتګ څخه هر کلی وکړ او ځوانانو سره د ګډ کار تعهد يې څرګند کړ.
