د ارزګان ولایت د مخابراتو او معلوماتي ټکنالوجۍ ریاست او د ارزګان پوهنتون ترمنځ د همکارۍ هوکړه لیک لاسلیک شو
د ارزګان ولایت د مخابراتو او معلوماتي ټکنالوجۍ ریاست او د ارزګان پوهنتون د کمپیوټر ساینس پوهنځي تر منځ د دواړو ادارو ترمنځ د کمپیوټر او معلوماتي ټکنالوجۍ په سکتور کې د ځوانانو د زده کړې لپاره د غوره چاپیریال رامنځته کولو په موخه د همکارۍ هوکړه لیک لاسلیک شو.
په هغه غونډه کې چې په همدې مناسبت جوړه شوې وه د یاد ولایت د مخابراتو او معلوماتي ټکنالوجۍ رئیس محترم حاجي ملا زین الله فاروقي د ټکنالوجۍ اهمیت په اړه په خپلو خبرو کې وویل چې معلوماتي ټکنالوجي د اوسنۍ زمانې یو ستر ضرورت دی او ژمنه یې وکړه چې له پوهنتون سره به د معلوماتي ټکنالوجۍ د زده کړې په هره برخه کې هر ډول مرسته او همکاري وکړي او ځوانان یې و هڅول چې د موجوده فرصت څخه د معلوماتي ټکنالوجۍ په سکټور کې خپلې پوهې د پراختیا لپاره پوره ګټه واخلي.
همداراز د ارزګان پوهنتون رئیس ښاغلي مولوي رحمت الله رحماني د ټولنو لپاره د ټکنالوجۍ او کمپیوټر زده کړې د اړتیا په اړه خبرې وکړې، او زیاته یې کړه چې ټکنالوجي د وخت د ضایع کېدو مخه نیسي او د ټولنیز او اقتصادي پرمختګ سبب ګرځی.
د یادونې وړده چې د مخابراتو او معلوماتي ټکنالوجۍ وزارت د اوسني عصر اړتیا او د ټکنالوجۍ ارزښت ته په کتو د هېواد په ټولو ولایتونو کې د کمپیوټر د زدهکړې علمي مرکزونه جوړ او د ټکنالوجۍ په پرمختللو وسایلو سمبال کړي چې د مجربو ښوونکو له لوري هېوادوالو ته پکې په علمي او عملي ډول تدریس کېږي.
