د مخابراتو او معلوماتي ټکنالوجۍ وزارت وزیر د ام ټي ان مخابراتي شرکت له مسئولینو سره لیدنه وکړه
د مخابراتو او معلوماتي ټکنالوجۍ وزارت وزیر محترم الحاج مولوي نجیب الله حیات حقاني افغانستان کې د ام ټي ان مخابراتي شرکت له رئیس ښاغلي هشام رمضان سره د مخابراتي ستونزو پر حل او همدا راز د یاد مخابراتي شرکت له لوري د سیمکارټونو د ثبت او راجسټریشن پر پروسې خبرې وکړې.
دغې ناسته کې د مخابراتو او معلوماتي ټکنالوجۍ وزارت د طرزالعمل مطابق د سیمکارټونو ثبت او راجسټر کول د ټولو مخابراتي شبکو مکلفیت وګاڼه او زیاته یې کړه چې مخابراتي شرکتونه باید په دې برخه کې آسانتیاوې ډېرې او پروسه ګړندۍ کړي.
د ښاغلي وزیر صاحب په وینا د سیمکارټونو له اړخه افغانانو ته ډېری ستونزې پیدا شوې وې او ولس له ډېرو ستونزو سره مخ و او اوس دا زمونږ مکلفیت دی چې دا ستونزې حل او ژر تر ژره افغانستان کې د سیمکارټونو د ثبت او راجسټریشن پروسه په بشپړ ډول قانوني کړو.
د ام ټي ان مخابراتي شرکت مسئولینو او رئیس ومنله چې افغانستان کې د سیمکارټونو دویش په برخه کې مخابراتي شرکتونو ناغیړي کړي او دوی اوس په دې هڅه کې دي چې د مخابراتو او معلوماتي ټکنالوجۍ وزارت او اټرا ادارې د قوانینو په اساس خپل خدمات مخې ته یوسي تر څو وکولای شي د قانون په پلي کولو سره د مخابراتو او معلوماتي ټکنالوجۍ وزارت له لوري سهولتونه ترلاسه کړي.
