د مخابراتو او معلوماتي ټکنالوجۍ وزیرې د هسپانیا هیواد په بارسلونا ښار کې د نړیوال مبایل سیسټم ټولنې (GSMA) او د مبایل سیستم نړیوال کانګرس (MWC) کې ګډون وکړ
په دې غونډه کې چې د جون له 28 څخه تر 30 پورې دوام لري د نړۍ له ګوټ ګوټ څخه ، د مخابراتو وزارتونو وزیرانو، د څانګو رییسانو او مخابراتي شرکتونو، نړیوالو سازمانونو په ګډون نفوذ لرونکي شخصیتونه د معلوماتي ټکنالوژۍ په اړه د خبرو اترو او خپلو تجربو شریکولو لپاره سره راټولیږي.
د دې غونډې اصلي هدف او تمرکز د ډیجیټل سیسټم له لارې ټولې نړۍ سره وصل کیدل او د هیوادونو د لوړ پوړو استازو لخوا موجوده ګواښونو او محدودیتونو ته په پام سره، د نن ورځې انساني اړتیاوو پوره کولو لپاره یو هراړخیز سیستم رامینځته کول دي.
د وزیرانو په غونډو کې د ګډون سربیره، د مخابراتو او معلوماتي ټکنالوجۍ وزیره معصومه خاوري به د GSMA چارواکو، د هیوادونو لوړ پوړو استازو او نامتو نړیوالو سازمانونو سره چې د معلوماتو او مخابراتي ټکنالوجۍ په برخه کې فعالیت کوي یو لړ مهمې ناستې ترسره کړي او د ډیجیټل زیربنا جوړولو او ګړندي کولو لپاره د مخابراتو وزارت د ماموریت د مهمې او لازمي برخې په توګه به هڅه وکړي چې د نن ورځې اړتیاوو سره سم د مخابراتو سکتور او معلوماتي ټکنالوجۍ کې د لا ښه پرمختګ او پراختیا لپاره زمینه برابره کړي.
پر دې برسیره به معصومه خاوري د ډیجیټل سیسټم او د لار نقشې له لارې افغانستان سره د نښلولو څرنګوالي په اړه یو لړ تخنیکي او ګډو ناستو او همدارنګه د روغتیایي ډیجیټل سیسټم جوړونې لپاره د مشرانو په غونډو کې ګډون وکړي.
د معلوماتو امنیت، نوښت، ډیجیټل بدلون او د اطلاعاتو او مخابراتو ټکنالوجۍ او د دوی غوښتنې، د ټولنې لخوا اړینو برخو کې لکه اقتصاد، تجارت، کرهنه ، روغتیا او د پوهنې په برخو کې نورې مهمې مسلې دي چې د مناسبو حل لارو موندلو لپاره به پدې ناسته کې بحث پرې وشي. .
په نړۍ کې د کورونا ویروس د خپریدو له امله، د معلوماتي ټکنالوجۍ اهمیت او آغیزمن کارول او د ډیجیټل زیربنا رامینځته کول خورا اړین شوي دي ترڅو د پالیسۍ جوړولو او پلي کیدو او ډیجیټل کولو له لارې د اقتصادي فعالیتونو او ټولنیزې هوساینې لپاره غوره زمینه برابره شي.
