د (af.) ډومینونو قیمت راټیټ شو
Publish Date
د مخابراتو او معلوماتي ټکنالوجۍ وزارت د (af.) ډومینونو قیمت راښکته کړ؛ دا په داسې حال کې دی چې د یادو ډومینونو پخوانی کلنی فیس ۵۰ امریکایي ډالره وه چې د مخابراتو او معلوماتي ټکنالوجۍ وزارت د لزوم دید او رهبرۍ د پریکړې پر بنسټ د (af.) ډومین کلنی فیس ۲۵ امریکایي ډالره وټاکل شو. د یادونې وړ ده چې د ډومینونو د فعالیت د ساحې پراخوالي په په موخه د ( tv.af.) او (media.af.) په نوم دوه نور زونونه هم اضافه شول؛ د دغو دوه زونونو د هر ډومین د ثبت قیمت ۴۰ امریکایي ډالره و ټاکل شو. د (af.) عمومي مدیریت د مخابراتو او معلوماتي ټکنالوجۍ وزارت د معلوماتي سیستمونو د امنیت ریاست تر چتر لاندې فعالیت کوي چې اساسي هدف یې په هېواد کې د (af.) تر نامه لاندې د ډومینونو ثبت او راجیسټریشن دی.
په بازار کې د سالمې سیالۍ په موخه د (af.) ډومین مرکزي کوډ تخفیف د ۲۰۱۸ زیږدیز کال د اپریل میاشتې له ۷ نیټې څخه پلی او د تطقیق وړ دی. د مخابراتو او معلوماتي ټکنالوجۍ وزارت د معلوماتي سیستمونو د امنیت ریاست له ۲۰۰۳ کال څخه تر دې مهاله ۸۶۰۰ ډومینونه ثبت او راجیسټر کړي دي.
د مخابراتو او معلوماتي ټکنالوجۍ وزارت
د رسنیو او عامه اړیکو دفتر