په کاری چاپیریال کې مسلکي چلند، د ښځو پر وړاندې د تاوتریخوالي او ځورونې د منځه وړلو قانون تر عنوان لاندې ورکشاپ
د روان 1397 کال د ثور د میاشتې په 24 مه نیټه د مخابراتو او معلوماتي ټکنالوجۍ وزارت د بشري سرچینو ریاست د ظرفیت جوړونې لوی مدیریت لخوا د ( په کاری چاپیریال کې مسلکي چلند، د ښځو پر وړاندې د تاوتریخوالي او ځورونې د منخه وړلو قانون) تر عنوان لاندې یوه ورخنی ورکشاپ جوړ شو.
په یاد ورکشاپ کې د مخابراتو وزارت د بشری سرچینو ریاست رئیس ښاغلي سید مسعود صمیم، د وړتیا لوړونې ادارې مسئول ښاغلي وفا محمد مصلح، د دعوت او ارشاد لوی مدیر ښاغلي مولوی دین خبر او د وزارت ښخینه کارکوونکو برخه اخیستې وه.
په پیل کې د بشري سرچینو رئیس د ورکشاپ د اهمیت په باره کې په تفصیل سره خبرې وکړې او وروسته ښاغلي وفا محمد مصلح د یاد ورکشاپ د محتوا په اړه معلومات ورکړ.
په ورکشاپ کې د لاندې موضوعاتو لکه: د کار په چاپیریال کې مسلکي چلند، انفرادی مسلکي ځانګړتیاوې، شخصیت او ارزښتونه، د کاري ژوند د موخو او مدیریت تعریفول، شخصي موخو د ټاکلو اهمیت، د شخصي او کاروباري ژوند لپاره پلان جوړول، صداقت، عدالت، د ډیپلوماسۍ اخلاق او په کار کې توپیرونه، رسمي مسلکي اړیکې، د سازمان د اړیکو مدیریت کول، حساب ورکوونه او اعتبار، شفافیت او ځواب ورکوونه او په رسمي میټنګونو کې د رهبری اصول او آدابو په اړه بحث او خبرې اترې وشوې.
همداراز د دعوت او ارشاد مدیر ښاغلي مولوي دین خبر د اسلام مقدس دین له نظره د ښځو د حقوقونو په اړه معلومات ورکړل او په افغاني ټولنه کې د پراخو اصلاحاتو هیله یې څرګنده کړه.