د مخابراتو او معلوماتي ټکنالوژۍ وزارت وزیر د پکتیا ولایت له والي سره لیدنه وکړه
د مخابراتو او معلوماتي ټکنالوژۍ وزارت وزیر ښاغلي الحاج ملا عبدالاحد فضلي د پکتیا ولایت له والي ښاغلي مولوي مهرالله حماد سره د یاد ولایت د مخابراتي ستونزو پر حل، لرو پرتو او فرضي کرښې په امتداد سیمو ته د مخابراتي خدمتونو پر رسولو خبرې وکړې.
په دغې ناسته کې د پکتیا ولایت والي ښاغلي مولوي مهرالله حماد د مخابراتو او معلوماتي ټکنالوژۍ وزارت له لوري د هېواد لرو پرتو سیمو او هغه برخو ته چې له کلونو راهیسې له مخابراتي خدمتونو بې برخې وې د آسانتیاو رسول یو مهم او اساسي ګام یاد کړ او خوښي یې څرګنده کړه چې اوس مهال د هېواد ټولو برخو ته د خدماتو پراختیا په چټکۍ روانه ده.
ښاغلي والي پکیتا ولایت کې د یو شمېر هغو سیمو چې لا هم له مخابراتي خدمتونو بې برخې دي د پوښښ او آسانتیاو د چمتو کولو غوښتنه هم وکړه.
ورته مهال د مخابراتو او معلوماتي ټکنالوژۍ وزارت وزیر ښاغلي الحاج ملا عبدالاحد فضلي د هېواد ټولو برخو ته په متوازن او عادلانه ډول د خدماتو په رسولو ټینګار وکړ او یادونه یې وکړه چې د پکتیا ولایت لرې پرتې او هغه سیمې چې د فرضي کرښې په امتداد دي له انټرنټي او مکالماتي آسانتیاو به برخمنې شي.
د یادونې وړ ده له فتحې وروسته د هېواد نورو ولایتونو تر څنګ د پکتیا ولایت ډېری او په ځانګړي ډول محرومو سیمو ته خاصه پاملرنه شوې او له مخابراتي چوپړ برخمن شوي او لا هم د یاد ولایت ډېری سیمو کې د مخابراتي انټنونو په جوړولو کار روان دی.
