پکتیکا ولایت شخیل آباد ولسوالۍ کې د روشن مخابراتي شرکت نوي 4G سایټ په فعالیت وکړ
د مخابراتو او معلوماتي ټکنالوجۍ وزارت د هدایت پر اساس د پکتیکا ولایت د مخابراتو او معلوماتي ټکنالوجۍ ریاست او روشن مخابراتي شرکت ګډو هڅو په ترڅ کې د پکتیکا ولایت شخیل آباد ولسوالۍ جعفر سیمه کې د روشن مخابراتي شرکت 4G مخابراتي او انټرنټي خدمتونه د لومړي ځل لپاره په رسمي ډول پرانیستل شول.
د روشن مخابراتي شرکت د مخابراتي اوانټرنټي 4G خدمتونو په فعالیدو سره به د یادې سیمې اوسېدونکي وکولای شي لوړ کیفیت او چټک انټرنېټي خدمتونو ته لاسرسی ولري او خپلې مخابراتي ستونزې هوارې کړي.
د دې سیمې اوسېدونکو د مخابراتو او معلوماتي ټکنالوجۍ د خدمتونو د پراختیا او کیفیت لوړولو په برخه کې د مخابراتو او معلوماتي ټکنالوجۍ وزارت کړنې وستایلې او د دغه ولایت د مخابراتو او معلوماتي ټکنالوجۍ ریاست له هڅو یې خوښي څرګنده کړه.
د یادونې وړده چې د روشن مخابراتي شرکت په نوموړي ولایت کې د خپلو ټولو سایټونو خدمتونه 4G ته لوړکړي دي او په راتلونکي کې د نوموړي ولایت د پاتې محرومو سیمو لپاره د نویوسایټونو له لارې د 4G خدمتونو د وړاندې کولو پلان لري.
