پکتيا کې پنځوس تنه د معلوماتي ټکنالوجۍ له شپږ مياشتيني کورس فارغ شول
چهارشنبه ۱۳۹۷/۷/۲۵ - ۱۱:۲۹
چهارشنبه/ د تلې ۲۵ مه/ ۱۳۹۷
د پکتيا ولایت د مخابراتو او معلوماتي ټېکنالوجۍ ریاست د معلوماتي ټېکنالوژۍ له شپږ میاشتني کورس (Diploma in Information Technology) څخه پنځوس تنه فارغ شول.
د پکتيا ولايت مرستيال والي محترم عبدالولي سهي، د فراغت په دغه غونډه کې وویل چې نوي نسل ته اړينه ده، تر څو د عصري ټکنالوجۍ او معاصرې ادارې او بهيرونو سره اشنايي تر لاسه کړي.
مرستيال والي، د مخابراتو او معلوماتي ټکنالوجۍ رياست له مسؤولينو او لنکن ښوونيز مرکز هم مننه وکړه چې د کمپیوټر او انګلیسي ژبې د زده کړو په برخه کې یې ځوانانو ته اسانتياوې برابرې کړې دي.
د پکتيا ولايت مخابراتو او معلوماتي ټېکنالوجۍ رئیس عبدالله توتاخېل وویل ددې تر څنګ چې له دې وړاندې يې اته جوپې نورو زده کوونکو ته هم ورته کورسونه جوړ کړي او په خبره يې چمتو دي چې د خویندو لپاره جلا ټولګی جوړ کړي، تر څو هغوی هم د کمپیوټر او معلوماتي ټکنالوجۍ معیاري زده کړو ته لاسرسی ولري.
ددې تر څنګ د پکتيا ولايت د مخابراتو او معلوماتي ټکنالوجۍ رياست کې د لېنکن ښوونيز مرکز د فعاليتونو پرانیسته هم شوه چې په راتلونکې د نورو ځوانانو لپاره هم ورته پروګرامونه برابر کړي.
