په پنجشیر کې د محلي ادارو پنځم بست کارکوونکو ته د سایبري امنیت تر عنوان لاندې پنځه ورځینی سیمینار پیل شو
د پنجشیر ولایت د مخابراتو او معلوماتي ټکنالوژۍ ریاست له لوري د محلي امارتي ادارو د کارکوونکو د سایبري امنیت پوهاوي د کچې لوړولو په موخه د پنځو ورځنیو روزنیزو پروګرامونو لړۍ روانه ده، چې د یادې لړۍ په دوام کې نن د پنځم بست کارکوونکو ته هم د سایبري امنیت په برخه کې روزنه پیل شوه.
د دغه ریاست د معلوماتو له مخې، په یاد روزنیز پروګرام کې کارکوونکو ته د سایبري امنیت، د معلوماتو د خوندي ساتنې، د ټکنالوژیکو سیستمونو د خوندي کارونې او له بېلابېلو سایبري ګواښونو او بریدونو څخه د مخنیوي په برخو کې اړینې زده کړې وړاندې کېږي.
د پنجشیر د مخابراتو او معلوماتي ټکنالوژۍ رئیس، عبدالحمید نوري په وینا چې یاد روزنیز پروگرام کې به د محلي ادارو کارکوونکي له نویو سایبري ګواښونو سره د مقابلې، د معلوماتو د خوندي ساتنې او د ټکنالوژیکو سیستمونو د مسلکي او خوندي کارونې په برخه کې لازم مهارتونه ترلاسه کړي. نوموړی زیاتوي، د سایبري پوهاوي لوړول کولی شي د ادارو د معلوماتو د خونديتوب ترڅنګ، د احتمالي سایبري بریدونو او امنیتي پېښو د مخنیوي په برخه کې هم اغېزمن تمام شي.
د یادونې وړ ده چې د دغه روزنیز پروګرام په په لړ کې تېره ورځ د څلورم بست کارکوونکو ته هم روزنه ورکړل شوې وه او ټاکل شوې ده چې د کارکوونکو د بستونو له مخې د سایبري پوهاوي دغه روزنیز بهیر به په راتلونکو ورځو کې هم دوام ومومي.
