سلام ملی شرکت دی او ټول کارکوونکي يې باید د ودې او پراختيا لپاره کار وکړي!
یکشنبه ۱۳۹۸/۴/۲۳ - ۱۶:۴۶
د مخابراتو او معلوماتي ټکنالوجۍ وزارت سرپرست محترم محمد فهیم هاشمی نن د سلام مخابراتي شرکت د مشتریان د خدماتو برخې څخه د لیدنې تر څنګ ددغه شرکت کارکوونکو ته لارښوونه وکړه چې د خلکو ستونزو ته رسيدګي وکړي او ددغه شرکت د وضعيت ښه کېدو لپاره کار وکړي.
ښاغلي هاشمي زیاته کړه چې سلام د افغانستان د ټولو خلکو ملکيت دی او په هر افغان پورې اړه لري چې عوايد يې بېرته خلکو ته رسېږي او د افغانستان د پرمختګ او ترقۍ لپاره مصرفېږي.
د مخابراتو او معلوماتي ټکنالوجۍ وزارت سرپرست ټینګار وکړ چې په سلام مخابراتي شرکت کې هېڅوک د سلیقوي، قومي، سمتي او زباني چلند حق نه لري او هر څوک باید د وړتيا، لیاقت او تخصص له مخې په شرکت کې کار وکړي.
ښاغلي هاشمي همدا راز د پېرودونکو د رضايت په موخه د سلام مخابراتي شرکت د يو شمېر پېرودونکو سره خبرې وکړې او د هغوی د ستونزو اورېدولو وروسته يې ډاډ ورکړ چې د سلام مخابراتي شرکت وضعيت په ښه کېدو دی او د مخابراتو او معلوماتي ټکنالوجۍ وزارت د خلکو د خوښۍ لپاره لاس په کار کېږي او هېڅ راز هڅه به درېغ نه کړي.
ښاغلي هاشمي زیاته کړه چې موږ ټول هڅه کوو، تر څو سلام مخابرتي شرکت د هېواد په کچه د یو بې ساري شرکت په توګه تبدیل کړ او دا زموږ د ټولو ملي وجيبه ده.
