د G42 شرکت مسئولینو د مخابراتو او معلوماتي ټکنالوجۍ وزیرې سره وکتل او د دوه اړخیزو همکاریو په تړاو یې خبرې وکړې

د متحده عربي اماراتو د G42 شرکت مسئولینو، د دولت مشرتابه او د اړوندو ادارو چارواکو سره د لیدنې وروسته، د دوشنبې په ورځ د مخابراتو او معلوماتي ټکنالوجۍ له وزیرې آغلې معصومه خاوري سره هم وکتل او د دوه اړخیزو همکاری په فرصتونو یې خبرې وکړې.

د G42 شرکت مسئولینو، سیمه ایزو بریالي موډلونو ته په کتو سره د برښنایي حکومتوالی پیاوړتیا او د ادارو ډیجیټل کولو په برخو کې د همکارۍ په اړه خپل نظریات د مخابراتو وزارت له رهبری سره شریک کړل.

د مخابراتو او معلوماتي ټکنالوجۍ وزیرې د G42 شرکت مسئولینو له حضور څخه د مننې ترڅنګ ژمنه وکړه چې د ولسمشر د لارښوونو او نظرونو سره سم به د افغانستان لوی ملي پروګرامونه، د الکټرونیکي حکومتدارۍ پیاوړتیا او ادارو ډیجیټل کول د ټاکل شوي معیارونو پر بنسټ پلي کړي.

همداراز د دې غونډې وروسته، د وزارت د پالیسۍ او پروګرامونو مرستیال ښاغلي احمد مسعود لطیف رای او د وزارت تخنیکي ټیم د بېلې غونډې په ترڅ کې د G42 شرکت د چارواکو سره د ګډو همکاریو په برخو کې په تفصیل خبرې وکړې.

په غونډه کې ټینګار وشو چې د بریالي سیمه ایزو ماډلونو پلي کول او د بریښنایی حکومتولی پلانونو او ستراتیژیو پلي کول د دولت او د مخابراتو او معلوماتي ټکنالوجۍ وزارت یو له لومړیتوبونو څخه دي او د تطبیق لپاره یې جدي کار روان دی.