د کاپیسا ولایت د مخابراتو او معلوماتي ټکنالوجۍ ریاست، مخابراتي او انټرنېټي شرکتونو ترمنځ د همغږۍ غونډه وشوه
د کاپیسا ولایت مخابراتو او معلوماتي تکنالوجۍ ریاست رهبري، په یاد ولایت کې د مخابراتو او معلوماتي ټکنالوجۍ اترا ادارې نماینده د مخابراتي او انټرنېټي شرکتونو د مسئولينو ترمنځ د ښو مخابراتي او انټرنېټي خدمتونو د ترسره کولو په موخه غونډه ترسره شوه.
په دې ناسته کې پر بېلا بېلو موضوعاتو لکه: د سیم کارتونو ثبت په اړه د مخابراتو او معلوماتي ټکنالوجۍ وزارت د اترا ادارې طرزالعمل پلي کولو، د سیم کارتونو پلور څرنګوالی، د لوړو بیو ګولډن سیم کارتونو د پلور مخنیوي، د انټرنېټي شرکتونو فریکونسي او ټاورونو جواز، او د مخابراتي او انټرنېټي شرکتونو د ګډونوالو شکایتونو او ستونزو ته پر وخت رسیدنې په اړه خبرې وشوې.
په دې ناسته کې سپارښتنه وشوه چې ټول انټرنېټي او مخابراتي شرکتونه دې د پورته یادو شويو مسائلو د حل لپاره عملي ګامونه واخلي او خپل خدمات دې د مخابراتو او معلوماتي ټکنالوجۍ وزارت د اترا ادارې د اصولو او کړنلارو له مخې وړاندې کړي.
د یادونې وړ ده چې د ټولو مخابراتي او انټرنېټي شرکتونو استازو د مخابراتو ریاست او د مخابراتو او معلوماتي ټکنالوجۍ وزارت اترا ادارې له دوامدارې همکارۍ مننه وکړه او ډاډ یې څرګند کړ چې ټولې کړنې به د اصولو او کړنلارې سره سم ترسره کوي.
