د ټاپی لویې پروژې چارې د افغانستان اسلامي امارت رییس الوزراء جلالتمآب الحاج ملا محمد حسن آخوند او د ترکمنستان هیواد د ملی مشر په حضور کې پرانیستل شوې
په دغه غونډه کې د افغانستان اسلامي امارت رییس الوزراء جلالتمآب الحاج ملا محمد حسن آخوند او د ترکمنستان هیواد ملي مشر جلالتمآب قربان قولي بردي محمد دوف چې د دواړو هیوادونود کابینی لوړپوړو چارواکو پکې ګډون درلود د چهارشنبې په ورځ د ترکمنستان هیواد په ماری (اسلیم چشمې) سیمه کې د ټاپي ستره پروژه رسماً افتتاح شوه.
د افغانستان د اسلامی امارت رییس الوزراء جلالتمآب الحاج ملا محمد حسن آخوند په خپلې ویناکې د افغانستان او ترکمنستان ولسونو، د هېواد د ګڼو وزارتونو محترمو وزیر صاحبانو، د ترکمنستان ملی مشر، د ترکمنستان هېواد ولسمشر او د غونډې ټولو ګډونوالو ته د دې پروژې د پیل له امله مبارکی وویله.
جلالتمآب رییس الوزراء وویل، مونږ، له ډېرو کلونو د دغې سترې اقتصادي پروژې پیلېدوته سترګې په لار وو، او د ستونزو او کړاوونو له ګاللو وروسته وتوانېدو چې د ټاپي پروژه پیل کړو اوسمهال د دغو لویو پروژو د پلي کیدو زمینه برابره شوې چې اوسمهال یې د پرانیستې شاهدان یو د ټاپي پروژې په عملي کیدو سره به د افغانستان او ترکمنستان هیوادونو ترمنځ اړیکې لا هم پیاوړې شي او د دواړو هېوادونو ولسونو ته به یې ګټې ورسېږي.
جلالتمآب رییس الوزراء د اسلامي امارت چارواکو ته لارښوونه وکړه چې د یادو پروژو بشپړولو لپاره په صداقت، اخلاص او ستړیا په ګاللو سره کار وکړي.
په دې مراسمو کې د ترکمنستان هېواد ولسمشر سردار بردی محمدوف د ویډیو کنفرانس له لارې وویل چې نن موږ د ټاپي پروژې په نوم چې کومه پروژه پیلوو په دې پروژه کې څلور لویی پروژې شاملی دي لومړی د اوبلن ګاز لیږد، دوهم نوري فایبر، درېیم د ریل پټلۍ او څلورم د نورالجهاد د بریښنا سب استیشن پروژو د جوړولو شاهدان یو.
هغه زیاته کړه چې د دغې لوی پروژې په پیل کیدوسره به د دواړو هېوادونو تر منځ، ورورګلوي او د ښه ګاونډيتوب اړیکې وده وکړي او د دغو مهمو پروژو پلي کیدل نه یوازې د ترکمنستان او افغانستان د ګټو لپاره بلکې د سیمې د ګټو لپاره هم مهمې دي.
په دې مراسمو کې د ترکمنستان ملی مشر ښاغلی قربان قولی بردی محمدوف هم په خپله وینا کې وویل چې نن د دواړو هېوادونو ترمنځ په اړیکو کې یو نوی باب پرانیستل شو او دا ورځ یې دواړو هېوادونو لپاره یوه مهمه او تاریخي ورځ وبلله چې ورسره به د دواړو هېوادونو اړیکې نورې هم پراخې شي.
د ترکمنستان ملي مشر وویل چې د نوري فایبر، ترانسپورت، مخابراتو، بریښنا انرژۍ او نورو برخو کې د دواړو هیوادونو ترمنځ همکاري د افغانستان لپاره ګټوره ده.
هغه وویل، زموږ د پالیسۍ یوه مهمه برخه دا ده چې په اقتصادي، سیاسي او ډیپلوماټیکو برخو کې افغانستان سره خپلې همکارۍ ته دوام ورکړو.
ښاغلی قربان قولي بردي محمدوف وویل، یادې پروژې به د افغانستان په اقتصادي، صنعتي ودې او همدا راز په ټولنیز ژوند مثبت تأثیر ولري د ښاغلي په وینا افغانستان کې به په زیات شمیرخلکوته کاري زمینه برابره شي، هر کال به د افغانستان لپاره شاوخوا یو میلیارد ډالره عواید ولري، د جوړ شویو لارو په کارولو سره به زموږ محصولات اروپایی هیوادونو ته ولېږدول شي.
د یادونې وړ ده چې د نوري فایبر پروژه چې د ټاپی پروژی یوه مهمه برخه تشکیلوی د دافغانستان اسلامي امارت رییس الوزراء جلالتمآب الحاج ملا محمد حسن آخوند د ترکمنستان هیواد ملي مشر جلالتمآب قربان قولي بردی محمدوف، د افغانستان اسلامي امارت د مخابراتو او معلوماتی ټکنالوجۍ وزیر الحاج مولوي نجیب الله حیات حقاني، او د دواړو لوریو نورو چارواکو په ګډون پرانستل شوه او دواړو لوريو د دې پروژې پیل د افغانستان، ترکمنستان او سیمې په ګټه وباله، د نوري فایبر پروژه به افغانستان د ترکمنستان له لارې له اروپا سره او ترکمنستان به د افغانستان له لارې له پاکستان او جنوبي آسیا او نورو ګاونډیو هیوادونو سره ونښلوي.
