د واخان دهليز پروژې د عملي کېدو لپاره د چين حکومت د همکارۍ تعهد
پنجشنبه ۱۳۹۷/۸/۱۷ - ۲۳:۴۵
د مخابراتو او معلوماتي ټکنالوجۍ وزیر محترم شهزاد آريوبي په چين کې د انټرنېټ د پنځم نړېوال کنفرانس په څنډه کې د چين د صنعت او مخابراتي ټکنالوجۍ وزیر محترم Chen Zhao Xiong سره د لېدنې تر څنګ د دوه اړخيزه اړيکو پر پراختيا او په ځانګړې توګه د واخان دهليز له لارې د چين سره د افغانستان د نښلېدو پروژې په اړه خبرې وکړې.
لکه څنګه چې د واخان دهليز پروژې سروې بشپړه شوې او د عملي کېدو په لار کې يې کوم خنډ نشته، نو په همدې خاطر محترم شهزاد آريوبي د پروژې د عملي کار د پېل لپاره خپل چينايي سيال ته په رسمي توګه د ۵۰ ميليونه ډالرو پروپوزل وسپاره.
محترم Chen Zhao Xiong ژمنه وکړه چې دغه پروژه به په خپلو لومړيتوبونو کې نيسي او ډېر ژر به يې اړوندو مسؤولينو سره د تائيدۍ په موخه شرکوي او افغانستان ته به ډېر ژر د مالي چارو د منظورۍ او تائيد خبر ورکړي.
ددغه پروژې په عملي کېدو سره افغانستان د چين، سويلي آسيا، اروپا او افريقا تر منځ د معلوماتو د ټرانزيټي مرکز په توګه رول تر سره کوي او د ميليونونه ډالرو عوايدو تر څنګ به افغانان په کمه بیه د چټک انټرنېټ څخه مستفيد شي.
