د هند د مرستیال سفیر سره ناسته وشوه
د مخابراتو او معلوماتي ټیکنالوجۍ سرپرست وزیر نن د خپل کار په دفتر کې ښاغلي ویراج سینګ د هند د مرستیال سفیر سره ولیدل.
په دغه ناسته کې د جنوبي اسیا په سپوږمکۍ کې افغانستان ته د دوه ټرانسپونډرونو د ورکړې، د هند لخوا افغانستان ته د یوې بېلې ځانګړې سپوږمکۍ، د مخابراتو او ټیکنالوجي په سکتور کې د کدرونو په روزلو، د کوچنیو پراختیایي پروژو او په دوه اړخیزو دوستانه اړیکو خبرې وشوې.
سرپرست وزیر د هند د همکاریو مننه وکړه او په اوږدمهاله دوه اړخیزو دوستانه اړیکو یې ټینګار وکړ. د هند مرستیال سفیر افغانستان په سیمه کې خپل بهترین دوست او شریک وباله. همدا راز پرېکړه وشوه چې ډېر ژر به د هند او افغانستان تر منځ د جنوبي اسیا د سپوږمکۍ څخه د ګټې اخیستنې لپاره یادښتلیک لاسلیک شي. په دغه سپوږمکۍ کې چې ټول ۱۲ ټرانسپونډرونه لري، دوه به یې په وړیا ډول افغانستان ته ورکړل شي. له دې سپوږمکۍ به د مخابراتو، تلویزوني خپرونو، کرنې، کانونو او نورو برخو کې ګټه پورته کړای شي.