د ملي رادارونو لومړۍ برخه له فرانسې څخه افغانستان ته راورسیده
دا ملي رادارونه چې د افغانستان حکومت لخوا له یوه فرانسوي شرکت څخه پیرودل شوي وو لومړۍ برخه نن سهار افغانستان ته را ورسیده.
د پیرودل شويو رادارونو د تحویلی مراسم د حامد کرزي نړیوال هوایی ډګر کې ترسره شول. پدې مراسمو کې د مخابراتو او معلوماتي ټکنالوجۍ وزیرې آغلې معصومه خاوري، د ولسمشرۍ د چارو ادارې د حکومت د چارو د انسجام مرستیال ښاغلي عبدالکریم توتا خیل، د ملکي هوایی چلند ادارې رییس ښاغلي فهد داود مومند، د چارو ادارې د دفتر د پانګوونې اسانتیا واحد رییس ښاغلي عطا الله نصیب، د فرانسې سفیر، د ملي دفاع وزارت لومړی مرستیال ښاغلي نجیب الله وردک، د تالس شرکت تخنیکي استازی او د اترا د ادارې رییس ښاغلي عمر منصور انصاري حضور درلود.
په افغانستان کې د ملي رادارونو د نصبولو تړون د ملکي هوایي چلند ادارې او فرانسوي تالس شرکت ترمنځ د ۱۱۲ ملیونه یورو په ارزښت لاسلیک شوی، چې تر ۲۰۲۳ کال پورې به د ۱۲ خپلواکو رادارونو سره افغانستان ته راولیږدول شي.
دا رادارونه د افغانستان په ۱۲ نقطو کې سره نښلول کیږي او د ۴۵،۰۰۰فټ پورې د هیواد هوایی حریم د کنټرولولو وړتیا لري.
د دې رادارونو لومړۍ محموله، چې نن افغانستان ته راورسیده به د کابل، هرات او مزار شریف په هوایی ډګرونو کې نصب شي.
د دې رادارونو نصب به د افغان حکومت د عوایدو کچه لوړه کړي او د هرې الوتنې عاید چې د افغانستان له فضا څخه تیریږي له ۷۵۰ ډالرو څخه تر ۹۵۰ ډالرو پورې رسیږي.
له بلې خوا، د دې رادارونو نصب کول به د فضایي حریم د کنټرول په برخه کې د افغانستان حکومت د حاکمیت وړتیا لوړه کړي.له بلې خوا، د دې رادارونو نصب کول به د فضایي حریم د کنټرول په برخه کې د افغانستان حکومت د حاکمیت وړتیا لوړه کړي.