د مخابراتو او معلوماتي ټکنالوجۍ وزیر د ام ټي ان مخابراتي شرکت له رئیس سره وکتل
د مخابراتو او معلوماتي ټکنالوجۍ وزیر الحاج مولوي نجیب الله حیات حقاني د ام ټي ان مخابراتي شرکت له رئیس محترم هشام رمضان سره وکتل او د دغه شرکت د مخابراتي ستونزو د حل په اړه یې خبرې وکړې.
د مخابراتو او معلوماتي ټکنالوجۍ محترم وزیر د ام ټي ان مخابراتي شرکت څخه د پیرودونکو شکایتونه چې د هیواد په ډیرو برخو کې د کمزوري آنتن، د سیم کارت اخیستلو یا راجستر کولو په وخت کې د اجباري کریډیټ اضافه کولو په اړه دي او د شریعت له نظره هم جواز نلري د ام ټي ان شرکت له رئیس سره یې شریک کړل او سپارښتنه یې وکړه چې دا ستونزه د ژر تر ژره حل کړي.
په ورته مهال د ام ټي ان مخابراتي شرکت رئیس د یادې ستونزې د څېړلو او حل کولو ژمنه وکړه.
نوموړي د ځينو تخنيکي ستونزو شتون ته هم اشاره وکړه او د وزارت له مسئولينو يې غوښتنه وکړه چې د یادو ستونزو په له منځه وړلو کې له دوي سره مرسته وکړي.
محترم الحاج مولوي نجیب الله حیات حقاني یادونه وکړه چې د مخابراتو او معلوماتي ټکنالوجۍ وزارت همکاري او ملاتړ له ټولو شرکتونو سره یو شان دی او مخابراتي ستونزو د حل کولو او په هیواد کې د هغې د ودې لپاره کار کوي.
همدا راز د مخابراتو او معلوماتي ټکنالوجۍ وزیر د تخنیکي ستونزو د حل په موخه د دغه شرکت له رئیس څخه وغوښتل چې په راتلونکې غونډه کې خپل مسلکي متخصصین را واستوي او یاده ستونزه د د وزارت له مسلکي ټیم سره په ګډه حل کړي.
