د مخابراتو او معلوماتي ټکنالوجۍ وزارت نوي ګمارل شوي رییسان د وزارت کارکوونکو ته معرفي شول
د افغانستان د اسلامي امارت د ریاست الوزرا عالي مقام د جلا جلا حکمونو په اساس، محترم شهزاده حسین عزیزي د مخابراتو او معلوماتي ټکنالوجۍ وزارت د معلوماتي ټکنالوجۍ خدمتونو د وړاندې کولو د رییس او محترم مولوی محمد رحیم ندیم د مخابراتو وزارت د افغان ټلیکام شرکت د مالي او اداري مرستیال په توګه ګمارل شوي دي د یوې غونډې په ترڅ کې په رسمي بڼه د وزارت کار کوونکو ته ور وپیژندل شول.
پیل کې د مخابراتو او معلوماتي ټکنالوجۍ وزیر محترم الحاج مولوي نجیب الله حقاني دغو رییسانو ته چې د وړتیا، کاري تجربې په پام کې نیولو مقرر شوي مبارکي و ویله او د دوي ټاکل یې د مخابراتو او معلوماتي ټکنالوجۍ په برخو کې ښه ګام وباله.
محترم الحاج مولوي نجیب الله حقاني دوي ته په کارونو کې د الله تعالی له درباره د توفیق غوښتنه وکړه او سپارښتنه یې وکړه چې د خپلو وړتیاو څخه په ګټه اخیستلو سره خپله دنده په بشپړ صداقت، ایمانداری او اخلاص سره سر ته ورسوي.
همدا ډول دغې ناسته کې دواړو تازه ګمارل شویو رییسانو د مخابراتو او معلوماتي ټکنالوجۍ له وزیر محترم الحاج مولوي نجیب الله حقاني څخه د دوی د ګمارنې له امله مننه وکړه او ژمنه یې وکړه چې په پوره اخلاص او صداقت به خپلې چارې پر مخ وړي.
