د مخابراتو او معلوماتي ټکنالوجۍ وزارت د رهبري پلاوی ناسته وشوه

د مخابراتو او معلوماتي ټکنالوجۍ وزارت د رهبري پلاوي ناسته د یاد وزارت د وزیر ښاغلي الحاج مولوي نجیب الله حیات حقاني په مشرۍ د وزارت مالي او اداري مرستیال ښاغلي ملا محمد حنیف حمزه او تخنیکي مرستیال استاد پوهنیار احمد مسعود لطیف رای په ګډون ترسره شوه او د اجنډا مطابق په موضوعاتو بحث او خبرې وشوې.

د مخابراتو او معلوماتي ټکنالوجۍ وزارت د رهبري پلاوي مجلس کې د بېلابېلو ریاستونو له کړنو ارزونه وشوه او د اړونده ریاستونو د رئیس صاحبانو له لوري یې راپورونه وړاندې شول، دغې ناسته کې ټینګار وشو چې د وزارت ټولې چارې باید پر وخت او د همغږۍ په اساس مخې ته لاړې شي.

د ریاستونو له لوري د کاري ګزارشونو وړاندې کولو په برخه کې د ډیجیټل حکومتولۍ عمومي رئیس ښاغلي عبدالرحمن ساپي د جوړ شویو سیسټمونو، هغه سیسټمونه چې اړونده او نیازمندو برخو ته په واک کې ورکړل شوي او هغه سیسټمونه چې اوس مهال چمتو او یا هم تر کار لاندې مفصل معلومات وړاندې کړل چې د مخابراتو او معلوماتي ټکنالوجۍ وزارت د رهبرۍ له لوري یې جزیات ټول واورېدل شول او په دې برخه کې لازم هدایات او سپارښتنې وشوې.

همدا ډول دغې ناسته کې د مخابراتو او معلوماتي ټکنالوجۍ وزارت تدارکاتي پروژو په تړاو هم معلومات وړاندې وشول او ډاډ څرګند شو چې تر دې دمه ټولې پروژې په سم ډول مخې ته تللي او هڅه شوې چې د کال تر وروستۍ نېټې پروژې تکمیل او ګټې اخیستنې ته وسپارل شي.

په ترتیب سره د ټکنالوجۍ د زیربناء عمومي ریاست رئیس ښاغلي سید منصور رحیمي د کلوډ د زیربناء په تړاو چې د هېواد ملي زیربناء ده د تکمیلیدو په تړاو معلومات وړاندې کړل او ډاډ یې څرګند کړ چې اوس مهال دوی کولای شي د هېواد په کچه ټولو امارتي وزارتونو او اداراتو په دې برخه کې خدمات وړاندې کړي او همدا راز د یاد ریاست اړوند د خدماتو د وړاندې کولو ریاست د افغانستان د ډومین او نکسا په تړاو چې د هېواد یو له حیاتي او مهمو برخو څخه دي معلومات وړاندې کړل چې اوس مهال هېواد کې د انټرنیټ ټرافیک د نکسا له طریقه سرته رسېږي او هغه ستونزې چې پخوا د لرې واټن، د معلوماتو محرمیت او یا هم د جګ لګښت په تړاو وې حل شوي دي او همداراز اوس هېواد کي (.af) چې د هېواد ملي ډومین دی ګڼو برخو ته خدمات وړاندې کوي.

ورته مهال د ټکنالوجۍ د زیربناء عمومي ریاست اړوند فایبر ریاست هم هېواد کې د شته زیربناء او د نوري فایبر په تړاو معلومات شریک کړل او په دې برخه کې د مقام له لوري یاد ریاست ته د چارو د ښه والي په موخه لازمې سپارښتنې او هدایات وشول چې له مخې به یې هېواد کې په معیاري ډول د نوري فایبر کیندنه صورت مومي او همدا راز هدایت وشو چې اړونده برخې چې د فایبر په برخه کې زیربنا نوې کوي او یا یې هم معیاري کوي لومړی باید خپل پلان له مخابراتو او معلوماتي ټکنالوجۍ وزارت سره شریک کړي.

د رهبري پلاوي دغې مجلس کې په هېواد کې د پوسټي شرکتونو په تړاو هم خبرې وشوې د مخابراتو او معلوماتي ټکنالوجۍ وزارت وزیر ښاغلي الحاج مولوي نجیب الله حیات حقاني د ترسره شویو فعالیتونو او همدا راز پوسټي بازار کې د شرکتونو له چارو څخه د نظارت په تړاو لازمې لارښوونې وکړې او یاد ریاست ته یې هدایت وکړ چې پوسټي بازار کې د غیر مجوز پوسټي خدمتونو د وړاندې کوونکو شرکتونو مخه باید و نیول شي او هغه شرکتونو چې اپرا یا د پوسټي خدمتونو د تنظیم ادارې ته یې د جواز د اخیستو په موخه مراجعه کړې معلومات یې له مقام سره شریک شي.

د یادونې وړ ده دغې ناسته کې د مخابراتو او معلوماتي ټکنالوجۍ وزارت وزیر ښاغلي الحاج مولوي نجیب الله حیات حقاني د ډیجیټلي مهارتونو د پراختیا عمومي ریاست ته هدایت وکړ چې د هغو ولایتونو معلومات له مقام سره شریک کړي چې تر دې دمه یې ښوونیز مرکزونه د برېښنا له ستونزې سره مخ دي چې له مخې به یې یادو ښوونیزو مرکزونو ته برېښنا چمتو او ښوونیز معیاري چاپیریال مساعد شي.

همدا راز ښاغلي وزیر صاحب ټینګار وکړ چې د تحقیق او نوښت ریاست په جوړېدو سره هېواد کې د ټکنالوجۍ په برخه کې نوښتګر کسان پیدا او د دوی د نوښتنو ملاتړ وشي او هڅه باید وشي د یاد ریاست په همکارۍ دغه پروسه جدي تعقیب شي.

د یادونې وړ ده د ډیجیټلي مهارتونو د پراختیا عمومي رئیس هېواد کې د اساسي او پرمختللو ډیجیټلي مهارتونو او ولایتونو کې د ښوونیزو مرکزونو په تړاو معلومات وړاندې کړل چې تر دې دمه له یادو ښوونیزو مرکزونو کابو ۳۱ زره کسانو ته د ټکنالوجۍ په برخه کې زده کړه ورکړل شوې او د فراغت سندونه یې ترلاسه کړي د نوموړي په خبره اوس دوی هڅه کوي د پرمختللي ډیجیټلي مهارتونو نصاب د هېواد ګڼو ولایتونو کې د مقام د سپارښتنې او هدایت اخیستو وروسته تطبیق او په لوړه کچه ډیجیټلي مهارتونه د مخابراتو او معلوماتي ټکنالوجۍ وزارت په ښوونیزو مرکزونو کې تدریس شي.