د مخابراتو او معلوماتي ټکنالوجۍ وزارت او د ولسمشرۍ د چارو ادارې د پانګونې آسانتیا واحد ترمنځ د همکاری هوکړه لیک لاسلیک شو

دغه هوکړه لیک نن (دوشنبه، د غویي ۶ نیټه ) د مخابراتو او معلوماتي ټکنالوجۍ وزارت او د ولسمشرۍ د چارو ادارې د پانګونې اسانتیا واحد ترمنځ د مخابراتو او معلوماتي ټکنالوجۍ وزیرې معصومې خاوري، د ولسمشرۍ د چارو ادارې د پانګونې اسانتیا واحد رئیس عطاء الله نصیب، د وزارت د بیلابیلو ریاستونو رئیسانو او کارمندانو په حضور د دغه وزارت د کنفرانسونو په تالار کې  لاسلیک شو.  
د دې تفاهمنامې اصلي موخې د غوره او موثره مخابراتي خدمتونو وړاندې کول، د اقتصادي ودې لپاره فرصتونه برابرول ، د خلکو سوکالي، د زیربناو پراختیا، په سکتور ي زیربناوو کې د کورنیو او بهرنیو پانګوونې راجلبول او د ډیجیټل حکومتداري پراخول دي.

د دغه هوکړه لیک له مخې به دواړو خواوو ته د پلان جوړولو څیړنې، کورنیو او بهرنیو پانګوالو او مرستندویه سرچینو را جلبولو، د مخابراتو او معلوماتي ټکنالوجۍ په برخه کې د ملي پروژو پلي کولو په موخه د دوامداره همکاریو لپاره لاره هواره شي. 
دا هوکړه لیک به د پنځو کلونو لپاره د اعتبار وړ وي او دواړه ادارې به د هوکړه لیک د مفاد پلي کولو لپاره ذیصلاح استازي و ټاکي او معرفي یې کړي.

همداراز په پای کې آغلې خاوري او ښاغلي نصیب د افغانستان اطلاعاتو ملي مرکز (ډیټاسینټر) څخه لیدنه وکړه، او پریکړه وشوه چې د نړیوالو نورمونو سره سم یو نوی او معیاري مرکز چې په هیواد کې د بیلابیلو څانګو معلومات خوندي کړي رامنځته کړي.