د مخابراتو او معلوماتي تکنالوجۍ وزارت او د عامې روغتیا وزارت ترمنځ د همکارۍ هوکړه لیک

د مخابراتو او معلوماتي تکنالوجۍ وزارت او د عامې روغتیا وزارت ترمنځ د همکارۍ هوکړه لیک د Tele Medicine تر عنوان لاندې د روان کال د زمري میاشتې  په ۲۷ نيته د یو مطبوعاتي کنفرانس په ترڅ کې چې په دغه وزارت کې د مخابراتو او معلوماتي ټکنالوجۍ وزیر ښاغلي عبدالرزاق وحیدی او د عامې روغتیا وزیر ښاغلي فیروزالدین فیروز په ګډون جوړ شوی وو لاسلیک شو.

په دغه کنفرانس کې لومړی  د مخابراتو او معلوماتي تکنالوجۍ وزیر ښاغلي عبدالرزاق وحیدی د ټولنو په بیلا بیلو ډګرونو کې د معلوماتي تکنالوجۍ د اهمیت پر اړخونو خبرې وکړي او وویل: دمخابراتو او معلوماتي تکنالوجۍ وزارت ویاړ لري چې د نورو پرمختګونو او لاسته راوړنو تر څنګ یو ځل بیا د اړیکو دپراختیا او ټولني ته د لا زیاتو او ښو خدمتونو وړاندې کولو په موخه  یو بل ګام اخلي.

نومړي زیاته کړه: چې مخکې مو د انټرنټ له لیارې د هیواد یو شمیر پوهنتونونه او ښوونځي یو بل او د نړۍ د علمي او تحقیقاتي  سرچینو سره نښلولي دي او د دغه هوکړه لیک څخه زمونږ موخه دهیواد په لیرو پرتو سیمو کې د معلوماتي ټکنالوجۍ څخه د ګټې اخیستنې له لارې خلکو ته د هر ډول تبعیض پرته، روغتیایي خدمتونه برابرول دي.

د مخابراتو وزیر وویل په دي توګه دواړه وزارتونه د هوکړه لیک په لاسلیکولو سره مکلف کیږي چې  په راتلوونکو پنځو کلونو کې هیواد والو ته د لوړې کچې اړین روغتیایي خدمتونه وړاندې کړي

همدا راز د عامې روغتیا وزیر ښاغلي فیروزالدین فیروز د خپلو خبرو په ترڅ کې په روغتیایي برخو کې د معلوماتي ټکنالوجۍ پر رول او اغیزې باندې رڼا واچوله او ویې ویل: چې د عامې روغتیا وزارت خلکو ته د روغتیایي خدمتونو د رسولو مسئولیت پر غاړه لري او د دغو مسئولیتونو د تر سره کولو لپاره لازمه ده چې معلوماتي ټکنالوجۍ څخه ګټه واخلو.

ښاغلي فیروز وویل: چې د معلوماتي ټکنالوجۍ په ذریعه کولای شو چې ګتور خدمتونه وړانې کړو، د ناروغ او ډاکتر تر منځ مستقیمه اړیکه رامنځته کړو او فاصلې له منځه ویسو.

ښاغلي ډاکټر فیروز یادونه وکړه چې د معلوماتي ټکنالوجۍ څخه په استفاده کولای شو چې د روغتیایي سکتور په برخو کې شفافیت او حساب ورکونه رامنځته کړو.

همدا راز د عامې روغتیا وزیر د مخابراتو او معلوماتي ټکنالوجۍ وزارت د همکاریو او مرستو څخه مننه وکړه.