د فراه ولایت د مخابراتو او معلوماتي ټکنالوجۍ ریاست ته نوی رییس ور وپیژندل شو
د فراه ولایت د مخابراتو او معلوماتي ټکنالوجۍ نوی ټاکل شوی رییس په هغه غونډه کې چې د فراه ولايت مرستيال والي محمد داود شېرزاد د ولایتي شورا رییس دادالله قانع، د ولایتی شورا غړي ګل احمد فقيري، د مخابراتو او معلوماتي ټکنالوجۍ ریاست، د افغان پست، د اترا ادارې او د افغان ټیلیکام ادارې کارکوونکو، د مدني ټولنو غړو، د رسنيو استازو او نورو ډېرو میلمنو پکې ګډون کړی وو معرفي شو.
د فراه ولایت د مخابراتو او معلوماتي ټکنالوجۍ نوي ريیس ښاغلي سحر په خپلو خبرو کې وويل چې په پوره قوت او انرژۍ سره به خلکو ته د مخابراتي خدمتونو په برابرولوکې نه ستړي کیدونکي هلې ځلې وکړي او په دې برخه کې یې د ولایت مقام څخه د کلک ملاتړ غوښتنه وکړه.
په غونډه کې د فراه ولایت د ولایتی شورا رییس نوموړي ته د مبارکۍ ویلو تر څنګ د مخابراتي خدمتونو په ښه کولو ټینګار وکړ. همدا راز د ولایت مقام مرستیال د معلوماتي ټکنالوجۍ او مخابراتو په اهمیت خبرې وکړې او د مخابراتي خدمتونو د لا ښه کېدو په برخه کې یې د نوي رییس سره د پوره همکارۍ ژمنه وکړه.
