د سیمکارتونو د ثبت او راجستریشن لپاره یو پرمختللی سیسټم جوړ او پلی شو
د مخابراتو او معلوماتي تکنالوجۍ وزارت د سیستم جوړونې ریاست لخوا د مخابراتي خدمتونو د تنظیم ادارې (اترا) د سیمکارتو د ثبت او راجستریشن د نوې کړنلارې پر بنسټ د سیمکارتونو د ثبت او راجستریشن پروسې د ښه مدیریت لپاره یو ډیر پرمختللی سیستم رامنځته شوی او اوس مهال تطبیق شوی دی، چې پر بنسټ یې ټول مخابراتي شرکتونه د سیمکارت د ثبت او راجستریشن پرمهال د مشتري د تذکرې تائيدي د یاد سیسټم له لارې د احصاییې ملي ادارې څخه ترسره کوي.
د دې سیستم له فعالیت سره اوس هېڅوک نه شي کولی چې په جعلي پېژندپاڼو سیمکارت ترلاسه او ثبت کړي، ځکه چې یاد سیستم د مخابراتي شبکو د سیمکارتونو د خرڅلاو برخه د احصاییې او معلوماتو د ملي ادارې د برېښنایي پېژندپاڼو له سېستم سره نښلولی ده، چې پر مټ یې د برېښنایي تذکرو له مخې د پیرودونکو د پېژندنې تثبیت ترسره او د اترا ادارې له تائید وروسته هغوی ته سيمکارتونه ویشل کېږي.
د یادولو وړ ده، چې اوسمهال په هېواد کې ۲۵ میلیونه فعال سیمکارتونه شتون لري چې لس میلیونه سیمکارټونه د الکټرونیکي پېژندپاڼو پر اساس ثبت شوي دي او یاده پروسه په ډیرې چټکۍ سره روانه ده.
