د بامیانو ولایت د مخابراتو او معلوماتي ټکنالوجۍ ریاست او د مخابراتي او انټرنټي شرکتونو ترمنځ د همغږۍ غونده تر سره شوه
یاده غونډه د مخابراتو او معلوماتي ټکنالوجۍ ریاست او د مخابراتي او انټرنټي خدمتونو د شرکتونو ترمنځ د همغږۍ د رامنځته کولو په موخه جوړه شوې وه.
په دې ناسته کې د ۲۰۲۵ کال د پراختیایي پلان د تطبیق، د مخابراتي او انټرنټي ټاورنو د ثبت او راجستر، د فریکونسیو د جوازونو صادرولو، د مخابراتي سایټونو د برېښنا د تأمین ستونزو، او په بامیان ولایت کې د مخابراتي او انټرنټي خدمتونو د کیفیت د ښه والي په اړه بحث او خبرې وشوې.
همداراز د دې غونډې په ترڅ کې یادونه وشوه چې د ۲۰۲۵ کال پای ته په رسېدو دی، اړینه ده چې اړوندې ادارې خپل پاتې پروګرامونه او پراختیايي پلانونه ژر تر ژره بشپړ کړي.
همدارنګه، د انټرنټي خدمتونو وړاندې کوونکو شرکتونو ته سپارښتنه وشوه چې خپلې چارې د صادر شوو فریکونسي جوازونو پر بنسټ او د ټاکل شوې ساحې په حدودو کې تنظیم کړي.
د یادونې وړ ده چې د مخابراتي او انټرنټي شرکتونو استازو د خپلو فعالیتونو او لاسته راوړنو د معلوماتو د وړاندې کولو ترڅنګ، د یاد ولایت د مخابراتو او معلوماتي ټکنالوجۍ ریاست له ملاتړ او همکارۍ څخه د مننې تر څنګ ژمنه وکړه چې خپلې چارې به د کړنلارو او اصولو له مخې پر مخ وړي.
