د انټرنېټ د بيو کمښت په اړه د انټرنېټي خدماتي شرکتونو مسؤولينو سره مشورتي ناسته
پنجشنبه ۱۳۹۸/۳/۲۳ - ۱۵:۱۲
د مخابراتو او معلوماتي ټکنالوجۍ وزارت سرپرست محترم محمد فهيم هاشمي نن د انټرنېټ د بيو کمښت او همدا راز د کيفيت د ښه والي په اړه د انټرنېټي خدماتي شرکتونو مسؤولينو، د اترا ادارې استازو او همدا راز د افغان ټېلې کام مخابراتي شرکت مسؤولينو سره په مشورتي ناسته کې خبرې وکړې.
د مخابراتو او معلوماتي ټکنالوجۍ وزیر په دغه سکټور کې د يادو شرکتونو د پانګونې څخه د مننې تر څنګ، د خدماتي شرکتونو، افغان ټېلې کام او اترا ادارې د همکارۍ غوښتنه وکړه.
ښاغلي هاشمي يادونه وکړه چې د انټرنېټي خدماتو مارکيټ باید متوازن و اوسي، په جدي توګه هر اړخيزه مطالعه تر سره او هر اړخيز تعادل په پام کې ونيول شي چې له یوې خوا مشتريانو او ګرانو هېوادوالو ته انټرنېټ په کمه بيه ورکول شي، دخدماتو کېفيت هم ښه شي او له بله پلوه د خدماتو وړاندې کوونکي شرکتونه هم زیانمن نه شي.
د انټرنېټي خدماتو شرکتونو، اترا ادارې او افغان ټېلې کام مسؤولينو ژمنه وکړه چې په راتلونکو ناستو کې به د قيمتونو د کمښت پر مېکانیزم بحثونه وکړي او د قيمت د کمښت تر څنګ به، د نړيوالو او داخلي قوانينو او کړنلارو په پام کې نيولو سره متوازن بازار او د دغه سکټور ودې ته زمينه برابره کړي.
