اروپایي او امریکایي هیوادونو ته د افغانستان هوایي پستي صادراتي توکو د لیږدونې په موخه د استانبول ترانزیتي مرکز و ټاکل شو

د روان  کال د لړم د میاشتې ۲۶ مه نیټه اروپایي او امریکایي هیوادونو ته د افغانستان هوایی پستي صادراتي توکو د لیږدونې په موخه د استانبول ترانزیتي مرکز د یو مطبوعاتی کنفرانس په لړ کې چې د مخابراتو او معلوماتی ټکنالوجۍ وزارت د کنفرانسونو په تالار کې جوړ شوی و اعلان شو.

په یاد کنفرانس کې د مخابراتو او معلوماتي ټکنالوجۍ وزارت مالي او اداري مرستیال ښاغلی وهاب الدین سادات وویل: د خوښۍ ځای دي چې د مخابراتو او معلوماتي ټکنالوجۍ وزارت د ډیرو مهمو لاسته راوړنو تر څنګ د هیواد پستي اقلامو او توکو د لیږدونې د کیفیت ، چټکتیا او خدمتونو د کچې د لوړولو په موخه ګام اخلی. ښاغلی سادات زیاته کړه: چې په دې وروستیو کې د مخابراتو او معلوماتي ټکنالوجۍ وزارت د پست ریاست او ترکیې هیواد په تفاهم اروپا او امریکایي هیوادونو ته د پستي توکو د ترانزیت مرکز د استانبول په ښار کې ټاکل شوی او په فعالیت یې پیل کړی دی.

ښاغلي سادات زیاته کړه: شک نشته چې د دغه مرکز د فعالیت په پایله کې به د پستی خدمتونو په چارو کې د پام وړ ښه والۍ رامنځته شي، د ښاغلي سادات په وینا پخوا به دا راز لیږدونې د پاکستان د پست دفتر له لارې ترسره کیدلې چې  د ۲۰ ورځو په موده کې امریکایی هیوادونواود ۱۵ ورځو په موده کې اروپایی هیوادونوته رسیدلې. اوسمهال د دغه مرکز په فعالیدو به امریکا او اروپایي هیوادونوته د توکو لیږدونې بهیر د ۲ – ۵ ورځو په موده کې تر سره کیږی.

ښاغلي وهاب الدین سادات خپلو خبرو په دوام یادونه وکړه: په تیرو څو کلونو کې پستی سکتور په برخه کې د پام وړ بدلون او پرمختګ ندی رامنځته شوی نو له همدی امله د مخابراتو او معلوماتی ټکنالوجۍ وزارت رهبري پلاوي د افغانستان د پستي خدمتونو د چټکې ودې لپاره خپل هڅو ته دوام ورکوی تر څو په دغه سکتور کې پانګونه رامنځته او هیوادوالو ته د کار فرصتونه برابر کړای شی. ښاغلي سادات په ټینګار سره وویل: د مخابراتو او معلوماتي ټکنالوجۍ وزارت د پست ریاست د سږ کال شپږو میاشتو عواید د تیر کال په پرتله ۱۵ سلنه زیاتوالۍ ښیی. د ښه او باکیفیته پستي خدمتونو د وړاندې کولو په موخه په پام کې ده چې د پست ریاست به په دولتی افغان پست شرکت بدل شی.