ارزګان ولايت کې د مخابراتو او معلوماتي ټکنالوجۍ رياست د کمپیوټر ښوونيز مرکز پرانيستل شو
د مخابراتو او معلوماتي ټکنالوجۍ وزارت د لارښوونې سره سم د ارزګان ولایت مخابراتو او معلوماتي ټکنالوجۍ ریاست ښوونیز مرکز د مخابراتو او معلوماتي ټکنالوجۍ وزارت د داخلي پلټنې رئیس محترم مولوي محمد طارق فاروقي او د څیړنې او پراختیا عمومي رئیس محترم الطاف احمد علمیار، د امارتي ولایتي ادارو رئیسانو او د نوموړي ولايت رسنيو او خلکو په ګډون په رسمي ډول پرانیستل شو.
په غونډه کې د مخابراتو وزارت د داخلي پلټنې او پراختیا رئیس محترم مولوي محمد طارق فاروقي وویل: "موږ اوس تر هر وخت د تکنالوژۍ او عصري علومو زده کړی ته اړتیا لرو ځکه تر هر وخت ښه زمینه برابره شویده." همدا رنګه نوموړي پر ځوانانو ږغ وکړ چی ځانونه د عصری علومو په ګاڼه سنبال کړي.
او همدا رنګه د مخابراتو او معلوماتي ټکنالوجۍ وزارت د داخلي پلټنې رئیس وویل چې د ولایتي روزنیزو مرکزونو د ارزښت او اهمیت ته په کتو سره دمخابراتو او معلوماتي ټکنالوجۍ وزارت مقام په لومړي قدم کې د ارزګان ولایت په ګډون د ۱۶ محرومو ولایتونو اړوند د کمپیوټر ښوونیز مرکزونه د تجهیز په پروګرام کې چې ورباندې څه د پاسه ۳۵ میلیونه افغانی لګښت راغلی دی شامل کړیدي.
د یادونې وړ ده چې د ارزګان ولایت ولسونو او د غونډې ګډونوالو د مخابراتو او معلوماتي ټکنالوجۍ وزارت د دغه نیک اقدام قدرداني وکړه او خوښي یې څرګنده کړه چې د مخابراتو او معلوماتي ټکنالوجۍ وزارت ارزګان ولایت ته د عصري ټکنالوجۍ او د کمپیوټر ښوونیز مرکز لپاره عصري تجهیزات برابر کړل چې له مخې به یې یاد ولایت کې د ټکنالوجۍ په برخه کې ظرفیتونه ډېر او ولس به یې له ګټو مستفید شي.
