آغلې معصومه خاوري د مشرانو جرګې د مخابراتو او مواصلاتو کمیسیون په ناسته کې ګډون وکړ
د مخابراتو او معلوماتي ټکنالوجۍ وزیري معصومه خاوري او د افغان ټلیکام مخابراتي شرکت یو شمیر چارواکو د مشرانو جرګې د مواصلاتو او مخابراتو کمیسیون په بلنه د یاد کمیسیون په ناسته کې ګډون وکړ او د کمیسیون غړو ته یې د ترسره شويو فعالیتونو ، د وزارت راتلونکي پلانونو ، د مخابراتي خدمتونو عمومي وضعیت ، نوري فایبر ، د افغان ټلیکام مخابراتي شرکت او سلام شبکې د خدمتونو کیفیت په اړه وضاحت ورکړ.
په دې ناسته کې چې د کمیسیون رئیس ښاغلي لطف الله بابا په ریاست جوړه شوې وه، د اترا ادارې رئیس ښاغلي عمر منصور انصاري هم برخه اخیستې وه، چې د مخابراتي خدمتونو 10 سلنه محصول راټولولو په شمول په اړوندو مسلو خبرې وکړې.
د مخابراتو او معلوماتي ټکنالوجۍ وزیرې د افغان ټلیکام مخابراتي خدمتونو په اړه څرګنده کړه چې دا شبکه د افغانستان په لیرې پرتو سیمو او نامناسب امنیتي شرایطو کې خدمتونه وړاندې کوي او زموږ تمرکز د دې شبکې د خدمتونو د کیفیت پراخول او ښه کول دي. نوموړې یادونه وکړه چې پدې شبکه کې د انتنونو شمیر به په راتلونکي کال کې ډیر شي او مخابراتي خدمتونه به پراخه شي.
د افغان ټلیکام د مخابراتي شرکت اجرایوي رئیس ښاغلي محمد صابر مومند هم د نوري فایبر د ودې، د شرکت د خدمتونو د ښه والي په اړه خبرې وکړې او ژمنه یې وکړه چې د غوره کیفیت خدمتونو وړاندې کولو لپاره به کار وکړي.
په پای کې د مشرانو جرګې د مخابراتو او مواصلاتو کمیسیون رئیس ښاغلي لطف الله بابا د مخابراتو او معلوماتي ټکنالوجۍ وزارت له مشرتابه مننه وکړه او د افغان ټلیکام مخابراتي شرکت د لا پیاوړتیا او پراختیا لپاره یې خپل وړاندیزونه وړاندې کړل.
