د الیکترونیکي تذکرو د وېش اړوند د رهبرۍ کمېټې دریمه غونډه وشوه
د الیکترونیکي تذکرو د وېش اړوند د رهبرۍ کمېټې دریمه غونډه د ولسمشر د دوهم مرستیال ښاغلي سرور دانش او اجرایه رئیس ښاغلي ډاکټر عبدالله عبدالله په حضور کې د عدلیې وزیر عبدالبصیر انور، د مخابراتو وزارت سرپرست ښاغلي شهزاد اریوبي، د حج او اوقافو وزارت معین او د نفوسو د ثبت ادارې مسئولینو تر منځ وشوه.
په سر کې د مخابراتو وزارت سرپرست وزیر ښاغلي شهزاد اریوبي د الیکترونیکي تذکرو اړوند د امادګیو په اړه راپور ورکړ او په دې اړه یې د تجهیزاتو، تخنیکي زېربناوو او د الیکترونیکي تذکرو د وېش لپاره د مناسبې فضاء د جوړولو په اړه خبرې وکړې.
د نفوسو د ثبت ادارې رئیس د کاغذي تذکرو په وېش کې د بهتره خدماتو، د شفافیت او د فساد څخه د مخنیوي په خاطر د کاغذي تذکرو د تایدي او نورو مراحلو لپاره خصوصي سکتور ته د سپارلو وړاندیز وکړ، چې له بحث وروسته ومنل شو.
د الیکترونیکي تذکرو د وېش د نېټې په اړه پرېکړه وشوه چې باید د حکومت او ملي شورای سره د ګډ تفاهم او بهتره همغږۍ وروسته اعلان شي، تر څو په راتلونکي کې هیڅ ډول قانوني موانع وجود ونلري. د الیکترونیکي تذکرو اړوند قانون دا مهال د مشرانو جرګې د پرېکړې انتظار باسي.
