ښاغلي امیرزي سنګين د باکو په نړیوال کنفرانس او نندارتون کې ګډون وکړ

د مخابراتو او معلوماتي ټکنالوجۍ وزیر ښاغلي امیرزي سنګین د آذربایجان د معلوماتي ټکنالوجۍ په هغه نړیوال کنفرانس او نندارتون کې ګډون وکړ چې ددغه هېواد په باکو ښار کې پرانستل شو.

په دغه کنفرانس او نندارتون کې د لومړي ځل لپاره د افغان صنعتکارانو لسو شرکتونو هم ګډون کړی و چې د معلوماتي ټکنالوجۍ اړوند خپل محصولات او ابداعات یې نړیوالو ته په ننداره کیښودل.

په دغه نړیوال کنفرانس او نندارتون کې د افغانستان په ګډون ۲۷ هیوادونو برخه اخیستې وه چې ۳۰۰ نړیوالو او سیمیزو صنعتې کمپنیو خپل محصولات او د معلوماتي ټکنالوجۍ اړوند نوښتونه یې نندارې ته وړاندې کړل.

دا نندارتون د باکو ښار، د باکو ایکسپو په ښکلي حال کې د ډسمبر په دویم پیل شوی چې پنځه ورځې به دوام کوي. له افغانستان څخه لسو صنعتي کمپنیو په کې برخه اخیستي چې ټولې د معلوماتې ټکنالوجي (IT) په برخه کې د کمپیوتر جوړولو، پروګرامینګ او همدارنګه د انټرنیتې خدماتو د وړاندې کولو په برخه کې فعالیت لري.

د افغانستان د صنعت په تاریخ کې دا لومړی ځل دی چې افغان صنعتکاران په یو نړیوال کنفرانس او نندارتون کې د افغانستان په استازیتوب برخه اخلي. د افغان صنعتکارانو تر څنګ په دې کنفرانس او نندارتون کې د مخابراتو وزیر ښاغلي امیرزي سنګین، د افغانستان د پانګوني د ملاتړ د ادارې ( آیسا) مشر وفي الله افتخار هم برخه واخیسته. د افغان صنعتکارانو تولیدات او لاسته راوړنې په دې کنفرانس او نندارتون کې ډیرې وستایل شوې او ډیرو سیمیزو او نړیوالو سوداګرو ورسره د  ګډ کار وړاندیزونه وکړل چې په افغانستان کې به ددې ځوان سکتور د پراخیدا او پرمختګ سره ستره مرسته وکړي.

د افغانستان د مخابراتو او معلوماتي ټکنالوجۍ وزارت د روان میلادي کال د سپټمبر میاشتې له ۲۴مې تر ۲۶مې پورې د افغانستان په تاریخ کې د لومړي ځل لپاره د مخابراتي او معلوماتي ټکنالوجۍ یو نړیوال کنفرانس او نندارتون په کابل کې پرانیست چې ډیری د بهرنیو هېوادونو د مخابراتو او معلوماتي ټکنالوجۍ وزارتونو استازو او د مخابراتي کمپنیو د تنظیم ادارو مشرانو په کې ګډون وکړ او له یاد نندارتون څخه یې لیدنه وکړه چې په ترڅ کې د مخابراتي او معلوماتي ټکنالوجۍ په اړوندو مسایلو خبرې وشوې او په دې برخه کې نوې تجربې سره شریکې شوې.