په فاریاب، سمنګان او سرپل ولایتونو کې د سلام شبکې خدمتونه پرانیستل شول

د روان ۱۳۹۳ کال د ثورمیاشتې په ۱۶ او ۱۸ مو نیټو د مخابراتو او معلوماتي ټکنالوجۍ وزارت تخنیکی مرستیال ښاغلي بریالی حسام او ورسره د دغه وزارت لوړ پوړي پلاوي لخوا په فاریاب،سمنګان او سرپل ولایتونو کې د سلام شبکې خدمتونه پرانستل شول.

ددغه سفرپه لړ کې د مخابراتو وزارت  تخنیکی مرستیال او ورسره پلاوي ته د یادو ولایتونو  د دولتي چارواکو او خلکو لخوا تود هرکلی وویل شو او په هغه غونډو کې چې د سلام شبکې د پرانیستل کیدو په مناسبت جوړې شوې وې ګډون یې وکړ.

ښاغلي حسام په دغو غونډو کې خبرې وکړې او د یاد وزارت لپاره یې د سلام شبکې د خدمتونو پیلول حیاتي وبلل، هغه وویل: چې مخابرات او معلوماتي ټکنالوجي د خلکو په اوسني ژوند کې بنسټیز رول لوبوي، ښاغلي بریالی حسام زیاته کړه: چې د مخابراتو وزارت هڅه کوي د هر راز او بیلابیلو شته امکاناتو څخه په ګټه اخیستنې په پراخه توګه هیواد والو ته مخابراتي او انټرنټي خدمتونه وړاندې کړي تر څو ګران هیواد په یوه معلوماتي ټولنه بدل شي.

همدا راز ښاغلي حسام د افغان ټیلي کام سلام شبکې  خدمتونو د ګټو په اړه لنډ معلومات ورکړل. هغه په خپلو خبرو کې وویل: چې  سلام شبکې د جوړولو څخه د مخابراتو او معلوماتي ټکنالوجۍ وزارت موخه په انټرنټي بیو کې ټیټوالی، د خدمتونو د کیفیت لوړول او په مخابراتي بازار کې سیالۍ ته وده ورکول دي.

همدې موخې ته د رسېدو لپاره افغان ټیلي کام چې یو دولتي شرکت دی د ۶۵ ملیون ډالرو په ارزښت د سلام 3G ټکنالوجۍ  خدمتونه یې بازار ته وړاندې کړل.

د یادولو وړ ده چې د یادو ولایتونو محترم والیان، قومي مشران او د ولایتي شورا غړو خبرې وکړې او د مخابراتو او معلوماتي ټکنالوجۍ وزارت د کړنو او لاسته راوړنو څخه یې ستاینې وکړې.