د مخابراتو او معلوماتي ټکنالوجۍ وزارت د افغانستان د مخابراتي او معلوماتي ټکنالوجۍ له محلي کمپنیو څخه د لیدني پروګرام پیل کړ

د مخابراتو او معلوماتي ټکنالوجۍ وزارت په افغانستان کې د مخابراتي او معلوماتي ټکنالوجۍ پراختیا ته ژمن دی، او د دې سکټور د ټولو اړوند لوریو تر منځ په نیژدي همکارۍ او همغږۍ باندې باور لري، او دا چې هغوی په اعتماد کې واخلي او په افغانستان کې د مخابراتي او معلوماتي ټکنالوجۍ د صنعت د روزنې لپاره د یوې مشترکې اجندا او لیدلوري په لور ګامونه واخلي.

په همدې هیله، د مخابراتو او معلوماتي ټکنالوجۍ وزارت د معلوماتي ټکنالوجۍ معیین، جلالتمآب ایمل مرجان د افغانستان د مخابراتي او معلوماتي ټکنالوجۍ له محلي کمپنیو څخه د لیدنې پروګرام پیل کړ، تر څو په افغانستان کې د معلوماتي او مخابراتي ټکنالوجۍ د خصوصي سکټور ظرفیت وارزوي، او دا چې د مخابراتو او معلوماتي ټکنالوجۍ وزارت لخوا د معلوماتي او مخابراتي ټکنالوجۍ د راتلونکې ستراتیژۍ او لیدلوري په پروسه کې هغوی هم برخوال کړي، او د سوداګرۍ په نړیوال سازمان (WTO) کې د افغانستان د غړیتوب په اړه عامه پوهاوي خپور کړي.

دا پروګرام د یو شمیر مشهورو معلوماتي او مخابراتي ټکنالوجۍ کمپنیو څخه په لیدني پیل شو، چې د TechNation، Afghanistan Reliable Technology Services (ARTS)، NetLinks، CodeZone او Afghanistan Holding Group (AHG) کمپنۍ سره د لیدنو په لړ کې، د مخابراتو او معلوماتي ټکنالوجۍ وزارت څخه جلالتمآب ایمل مرجان، او د ټکنالوجۍ او نوښت رئیس ښاغلی ویس پایاب د نوموړو کمپنیو له مسؤولینو سره وکتل، د هغوی د اوسنیو محصولاتو، خدماتو او پروژو په اړه یي خبرې وکړي، د هغوی ستونزي او وړاندیزونه یي واوریدل او د هغوي وړتیاوي یي وارزولي.