د کونړ ولایت د مخابراتو او معلوماتي ټکنالوجۍ ریاست د کمپیوټر ښوونیز مرکز څخه ۵۵ تنه زدکوونکي فارغ شول
د کونړ ولايت مخابراتو او معلوماتي ټکنالوجۍ رياست له لوري د کمپيوټري پروګرامونو (مایکروسافټ آفیس، وینډوز او انټرنیټ) په برخه کې له شپږ مياشتنيو زده کړو وروسته ۵۵ تنو زده کوونکو ته بري ليکونه وويشل شول.
د یادو زدهکوونکو د فراغت په موخه جوړه شوې غونډه کې د کونړ ولایت مرستیال والي، د بېلابېلو امارتي ادارو رئیسانو، استادانو، زدهکوونکو او محصلینو ګډون کړی و.
د کونړ ولایت د مخابراتو او معلوماتي ټکنالوژۍ رئیس، ښاغلي الحاج عبدالولي مارشال، ګډونوالو د ښه راغلاست ترڅنګ فارغانو ته د فراغت مبارکي وویله.
نوموړي د معلوماتي ټکنالوژۍ او ډیجیټلي مهارتونو پر اهمیت خبرې وکړې او څرګنده یې کړه چې د اوسني عصر له اړتیاوو سره سم د کمپیوټري مهارتونو زدهکړه د ځوانانو او د امارتي ادارو لپاره ځانګړی اهمیت لري.
وروسته د کونړ ولایت مرستیال والي د معلوماتي ټکنالوژۍ پر اهمیت، او د ځوانانو لپاره د ډیجیټلي مهارتونو د زده کړې پر اړتیا خبرې وکړې. همدارنګه یې فارغانو ته د فراغت مبارکي وویله او د لا ډېرو زده کړو، مسلکي پرمختګ او بریالیتوبونو لپاره یې وهڅول.
