د مخابراتو او معلوماتي ټکنالوجۍ وزارت د حقوقي چارو ریاست نوی رییس او آمر د وزارت کارکوونکو ته وروپیژندل شول
د مخابراتو او معلوماتي ټکنالوجۍ وزارت د وړاندیز او د ریاست الوزراء عالي مقام د حکم د منظورۍ له مخې ښاغلی مفتي نورالله ربیعه چې په فقه او قانون کې تخصص او لوړې زده کړې لري د حقوقي چارو ریاست د رییس او ښاغلی نورالله حبیب یار د حقوقي ریاست د آمر په توګه د مخابراتو او معلوماتي ټکنالوجۍ وزارت وزیر محترم الحاج مولوي نجیب الله حیات حقاني له لوري د وزارت کارکوونکو ته معرفي او په دندو وګمارل شول.
دغې ناسته کې د مخابراتو او معلوماتي ټکنالوجۍ وزارت وزیر ښاغلي الحاج مولوي نجیب الله حیات حقاني د مبارکۍ تر څنګ یاد کسان د علمیت او استعداد له مخې وړ او مناسب وبلل او دوی ته یې په خپلو چارو کې د توفیق غوښتنه وکړه او همدا راز ټینګار یې وکړ چې ورسپارل شوې دندې باید په پوره اخلاص او صداقت سر ته ورسوي .
د ښاغلي وزیر صاحب په وینا چارې هغه وخت ګړندۍ پر مخ ځي کله چې اخلاص، صداقت او د مشرانو اطاعت موجود وي او مونږ ټول مکلف یو چې د خپلو دندو په سرته رسولو کې له اخلاص او صداقت ګټه واخلو او د مشرانو اطاعت وکړو.
ورته مهال د حقوقي چارو ریاست نوي ګمارل شوي رییس ښاغلي مفتي نورالله ربیعه او د یاد ریاست آمر ښاغلي نورالله حبیب یار د وزارت له مشرتابه مننه وکړه چې دوی یې د یادو بستونو لپاره مناسب ګڼلي او اعتماد یې پرې کړی او ډاډ یې څرګند کړ چې ورسپارل شوی مسؤلیت به پوره اخلاص او صداقت سر ته رسوي.
