لرو پرتو سیمو ته د مخابراتي خدمتونو د رسولو په موخه د مخابراتو او معلوماتي ټکنالوجۍ وزارت او مخابراتي شرکتونو تر منځ د ۳۶۵ میلیونو افغانیو په ارزښت تړون لاسلیک شو

د یوې ناستې په ترڅ کې چې د ریاست الوزراء عالي مقام اقتصادي مرستیال ملا عبدالغني برادر او د مخابراتو او معلوماتي ټکنالوجۍ وزارت وزیر محترم مولوي صاحب نجیب الله حقاني هم حضور درلود د خصوصي مخابراتي شرکتونو سره د ۳۶۵میلیونو افغانیو په ارزښت هغو سیمو لپاره چې د مخابراتي خدمتونو څخه بې برخې دي د مخابراتي خدمتونو د رسولو تړون لاسلیک شو.

دغې ناسته کې د ریاست الوزراء عالي مقام اقتصادي مرستیال محترم ملا عبدالغني برادر د یادو تړونونو د لاسلیک کېدو پر مهال وویل،د افغانستان اسلامي امارت د ملت خدمت د ځان مسؤلیت ګڼي او په ټول توان هڅه کوي چې هېوادوالو ته د ژوند د نورو برخو ترڅنګ، په ښه او لوړ کیفیت مخابراتي خدمتونه هم وړاندې کړي. 

محترم ملا صاحب زیاته کړه، اسلامي امارت په افغانستان کې د پانګونې لپاره ښې اسانتیاوې رامنځ ته کړي او د ټولو هغو ملي سوداګرو او پانګوالو له هڅو قدردانی کوي چې د هېواد د اقتصادي ودې په موخه پانګونه کوي. 
‏د دغو قراردادونو له مخې افغان بیسیم او ام‌ټي‌ان مخابراتي شرکتونه د کندهار، نورستان، بدخشان، ارزګان، زابل، کونړ، ننګرهار او کابل ولایتونو کې د ۳۳ سایټونو د جوړېدو له لارې په هغو لرې پرتو سیمو کې چې خلک مخابراتي خدمتونو ته لاسرسی نه لري؛ مخابراتي خدمتونه وړاندې کړي.