ښځې او نجونې- مخابرات او معلوماتي ټکنالوجي نړیواله ورځ ولمانځل شوه
د مخابراتو او معلوماتي ټکنالوجۍ وزارت لخوا په افغانستان کې د لومړي ځل لپاره (ښځې او نجونې- مخابرات او معلوماتي ټکنالوجي) نړیواله ورځ ولمانځل شوه.
نن پنجشنبه د ۱۳۹۷ کال د ثور میاشتې ۶ مه چې د اپریل له ۲۶ مې نیټې سره برابرده “ښځې او نجونې-مخابرات او معلوماتي ټکنالوجي” نړیواله ورځ چې د ښځو چارو وزیرې آغلې دلبر نظري، لوړ پوړو کورنیو او بهرنیو چارواکو او په مخابراتو او معلوماتي ټکنالوجۍ سکټور پورې تړلیو ښځو او نجونو پکې برخه درلوده ولمانځل شوه.
په دغه ناسته کې د مخابراتو او معلوماتي ټکنالوجۍ محترم وزیر شهزاد اریوبي د مخابراتو او معلوماتي ټکنالوجۍ سکټور د مسئول په حیث ژمنه وکړه چې د منظمو پلانونو له مخې به د ښځو او نجونو د ظرفیت لوړونې، دوی ته د کاري او زده کړو فرصتونو برابرولو په برخه کې لازم ګامونه پورته کړو. سربیره پردې د محترم اریوبي لخوا د مخابراتو او معلوماتي ټکنالوجۍ په برخه کې نوښتګرې نجونې او ښځې وستایل شوې.
همدارنګه د غونډې په څنډه کې یې په ښځو چارو وزارت کې د (Government Resource Planning) سیستم د تطبیق په هدف د یاد وزارت له وزیرې سره یو هوکړه لیک لاسلیک کړ او په اخر کې یې له هغه نندارتون څخه هم لیدنه وکړه چې د ښځو او اړونده شرکتونو لخوا ترتیب شوی و.
