د مخابراتو او معلوماتي ټکنالوجۍ وزارت د ډیجیټل مهارتونو د پراختیا رییس معرفي شو
ښاغلی محمد ضیا ثنا په رسمي ډول د مخابراتو او معلوماتي ټکنالوۍ وزارت د ډیجیټل مهارتونو د پراختیا رییس په توګه معرفي شو.
د مخابراتو وزارت د پالیسۍ او پروګرامونو مرستیال ښاغلي احمد مسعود لطیف رای د معرفی په دې مراسمو کې چې د دغه وزارت د بیلابیلو څانګو رییسانو، استادانو او د پولی تخنیک پوهنتون چارواکو هم پکې برخه اخیستې وه ښاغلي ثنا ته د هغه د دندو او مسؤلیتونو مبارکي وویله، او د ښاغلي محمد ضیا ثنا بریالیتوب یې د وړتیا مثال په توګه یاد کړ او د ډیجیټل کیدو په برخه کې د ادارې د موخو د تحقق لپاره پر مسؤلیت پذیرۍ او ګډې همکارۍ ټینګار وکړ.
همداراز ښاغلي ثنا د وزارت د بیلابیلو ادارو او برخو تر منځ همکارۍ او همغږۍ او د لا ډیرو خدمتونو وړاندې کولو پر هڅو ټینګار وکړ. هغه وعده وکړه چې زه به د خپلې پوهې او تجروبو نه په ګټې سره د معلوماتي ټکنالوژۍ سکتور ته وده او پراختیا ورکړم او په دې لار کې به خپلې هڅې او کوښښونه دریغ نکړم.
ښاغلي ثنا د اداري اصلاحاتو او ملکي خدمتونو خپلواک کمیسیون د آزادې سیالۍ له لارې او د 10/8/1399 نیټې د 2015 ګڼې د جمهوري ریاست مقام حکم سره سم پدې پست کې معرفي شوی.
نوموړی تر دې وړاندې د کابل پولی تخنیک پوهنتون د کادر په څانګه او د یاد پوهنتون د کمپیوټر ساینس پوهنځي رییس په توګه دنده ترسره کړې.
