د مخابراتو اومعلوماتي ټکنالوجۍ او دپوهني وزارتونو ترمنځ د همکاریو تفاهملیک لاسلیک شو
د مخابراتو او معلوماتي ټکنالوجۍ اوپوهني وزارت د”مخابراتی او معلوماتی ټکنالوجۍ رول په پوهنه کې“ تر سرلیک لاندي د همکاریو تفاهملیک نن سه شنبه د1391 کال د سلواغې په 10 نیټه د مخابراتو او معلوماتي ټکنالوجۍ وزیر ښاغلي انجنیر امیرزي سنګین او د پوهني وزیر ښاغلي داکتر غلام فاروق وردک ترمنځ د یو مطبوعاتي کنفرانس په ترڅ کې چې د مخابراتو وزارت د کنفرانسونو په تالار کې جوړ شوی وو، لاسلیک شو.
د مخابراتو او معلوماتي ټکنالوجۍ وزیر ښاغلي انجنیر امیرزي سنیګن وویل : د مخابراتو وزارت ویاړ لري چې دنورو پرمختګونو او مخابراتي لاسته راوړنو ترڅنګ د معلوماتي ټکنالوجۍ په پراختیا کې یو بل ګام اوچتوي او معلوماتي ټکنالوجي د هیواد ښوونځیو ته رسوي.
ښاغلي سنګین زیاته کړه ددغه تفاهملیک په بنسټ به د مخابراتو او معلوماتي ټکنالوجۍ وزارت د مخابراتي خدماتونو د پراختیا له صندوق څخه، د پوهني وزارت په یو شمیر ښوونځیو او مسلکي لیسو کې د معلوماتي ټکنالوجۍ په کاروني سره د زده کړي او تدریس آسانتیاوي برابري کړي او د دغوهمکاریو په پایله کې به ښوونځیو ته انترنت، دکمپیوتر خوني اوهغه وسایل او توکې چې استادان او زده کوونکي وتوانیږي چې د زده کړي بهیر په پرمختللي او عصری توګه ترسره کړي، چمتو شي.
د مخابراتو وزیر وویل : یاد خدمتونه به لومړی د کابل ښار په پنځو مسلکي لیسو کې وړاندې شي اوپه دویم پړاؤ کې به دکابل او د ولایاتو یو شمیر ښوونځیو ته د معلوماتي ټکنالوجۍ خدمتونه ورسول شي.
د پوهني وزیر ښاغلي داکتر غلام فاروق وردک د همکاریو تفاهملیک لاسلیکولو څخه خوښي څرګنده کړه او دهیواد په ټولو برخو کې يي دمخابراتو او معلوماتي تکنالوجۍ خدمات وستایل او وویل: د پوهني وزارت هڅې کوي ترڅو په پرمختللي توګه د روزني او زده کړي آسانتیاوي برابري کړي چې دادی د مخابراتو او معلوماتي تکنالوجۍ وزارت په مرسته دهیواد په ښوونځیو کې د معلوماتي تکنالوجۍ سهولتونه ګټه اخیستلو ته چمتو کیږي.
ښاغلي ودرک زیاته کړه چې د دغه تفاهم لیک په لاسلیکولو سره به د کابل میخانیکي انستیتوت، د تجارت د نسوانو لیسه، د افغان تکنالوجی انستیتوت، د سید جماالدین دارالمعلمین، د مسلکي استادانو د روزني انستیتوت کې یاد خدمات وړاندې شي او په دغو مرکزنو کې به استادان تربیه او له فراغت وروسته به د هیواد په نورو ښوونځیو کې خدمت کوي.
د هغه په وینا د پروژي کار د تفاهم لیک له لاسلیکولو سره پیلیږي او په پنځو یاد ښوونیز مرکزونو کې به تر ۳ راتلوونکو میاشتو پوري پلی شي او د 1392 کال ترپایه پوري به 50 ټول ښوونځیو کې د معلوماتي تکنالوجۍ خدمات وړاندې شي او شاوخوا 50 زره زده کوونکي او استادان به معلوماتي تکنالوجی ته لاس رسی پیدا کړي .
د یادولو وړ ده چې د یادي پروژي ټولیز لګښت دوه میلیونه امریکائي ډالرو په شاوخوا کې دی چې د مخابراتو د خدماتو د پراختیا صندوق څخه به د مخابراتو د قانون سره سم د ATRA ادارې له لوري اداره او ورکول شي.
