په لغمان ولایت کې د معلوماتي ټکنالوجۍ شورا د جوړولو طرح به ډیر ژر نهایِي شي

په لغمان ولایت کې د معلوماتي ټکنالوجۍ شورا د جوړیدو طرح د نظر غوښتنې په موخه په ۱۹/۴/۱۴۰۰ نیټه د ولایت اداري مجلس ته وړاندې شوه.

دناستې د پریکړې په بنسټ دطرحې د بیا کتنې لپاره یوه کمیټه وټاکل شوه ترڅو دغه طرح په هر اړخیز ډول وڅیړي او د تائید لپاره یې راتلونکې اداري غونډې ته وړاندې کړي.

د ولایت مرستیالې اغلی بریښنا صافۍ په مشری د بیا کتنې کمیټې په دې وروستیو کې دا طرح په هر اړخیز ډول وڅیړله او د لږو تغیراتو په راوستلو یې طرح تائید او د منظورۍ لپاره یې د راتلونکې اداري جلسې په اجنډا کی شامله کړه.

د یادونې وړ ده چې د معلوماتي ټکنالوجۍ شورا طرح څه موده وړاندی د مخابراتو او معلوماتې ټکنالوجۍ ریاست لخوا پدې ولایت کې په ورځنیو چارو کې د معلوماتي ټکنالوجۍ څخه د ګټې اخیستنې لپاره د ټولو ادارو د هڅولو او د هغوی ژمنتيا او ملاتړ ترلاسه کولو، دولایت په کچه د معلوماتي ټکنالوجۍ د خدمتونو همغږی، پراختیا او معیاري کولو،په تخصصي او مسلکي برخو کې د دولتي ادارو د کارکوونکو د وړتیاو لوړولو او له شته تخصصي ځواک څخه په ټولو ادارو کې تر اعظمی حده په مشترک ډول ګټه اخیستلو په موخه جوړه شوې چې د ولایت د اداري غونډې له تائید وروسته به دغه شورا عملا په کار پیل وکړی.