د معلوماتي ټکنالوجۍ په برخه کې د همکارۍ هوکړه لیک د مخابراتو، لوړو زده کړو او پوهنې وزارتونو تر منځ لاسلیک شو

د مخابراتو او معلوماتي ټکنالوجۍ، لوړو زده کړو او پوهنې وزارتونو ترمنځ د همکاری هوکړه لیک په پوهنه کې د مخابراتو او معلوماتي ټکنالوجۍ وزارت رول تر سرلیک لاندې د یو مطبوعاتي کنفرانس په ترڅ کې لاسلیک شو.

لومړی د مخابراتو او معلوماتي ټکنالوجۍ وزیر ښاغلي عبدالرزاق وحیدي د هوکړه لیک په اهمیت او ارزښت خبرې وکړې او زیاته یې کړه: چې د دغې همکاری موخه د پوهنې او زده کړې په ډګر کې د برښنایي او معلوماتي ټکنالوجۍ څخه په سمه توګه ګټه اخیستنه ده.

ښاغلي وزیر زیاته کړه: چې د نوري فایبر او انټرنټ له لارې د هیواد پوهنتونونو نښلول یو بل سره او د نړۍ پوهنتونونو او نور علمي او تحقیقاتي سرچینو سره د مخابراتو او معلوماتي ټکنالوجۍ وزارت غواړي چې د هیواد په ښوونځیو او تحصیلي بنسټونو کې د زده کړې لازمې اسانتیاوې برابرې کړي.

ښاغلي وحیدي یادونه وکړه: چې د دغه هوکړه لیک پربنسټ د مخابراتو او معلوماتي ټکنالوجۍ وزارت ژمن دی چې د هیواد په ټولو ښوونځیو او لوړو زده کړو مرکزونو کې د پوهنې او لوړو زده کړو د پراختیایي پروژو، په ښوونه او تحصیلاتو کې د معلوماتي ټکنالوجۍ څخه د استفادې، د ویډیو کنفرانسونو، وړیا انټرنټ زمینه برابره کړي.

ورپسې د لوړو زده کړو وزیره پوهنواله فریده مومند د همکاریو د هوکړه لیک د لاسلیک کیدو له امله خپله خوښي څرګنده کړه او ویې ویل: چې یاد هوکړه لیک د هیواد د اساسي قانون په رڼا کې په هیواد کې د مؤثرو ښوونیزو پروګرامونو، لوړو زده کړو، مخابراتي او معلوماتي ټکنالوجۍ د ښو او دوامدارو خدمتونو د وړاندې کولو په موخه لاسلیک شوی دی.

آغلې مومند زیاته کړه: چی د لوړو زده کړو وزارت ژمن دی چې د پوهنتونونو لابراتوارونه په الکټرونیکي او معلوماتي ټکنالوجۍ باندې تجهیز او انټرنټ سره و نښلوي، استادانو او محصلینو لپاره کمپیوتري او معلوماتي ټکنالوجۍ زده کړه تقویه او په تدریج سره د پوهنې تدریسي او تعلیمي نصاب د کمپیوټر په ذریعه په بصري او سمعي تعاملي تعلیماتو بدل کړي.

همدا راز د پوهنې وزیر ښاغلي ډاکټر اسدالله حنیف بلخي پخپلو خبرو کې وویل: چې د پوهنې وزارت ژمن دی، چې د الکټرونیکي وسایلو او معلوماتي ټکنالوجۍ څخه د ګټې اخیستنې په موخه هراړخیز پروګرام جوړ کړي.

هغه زیاته کړه: چې استادانو او شاګردانو لپاره د معلوماتي ټکنالوجۍ تعلیمي نصاب د تطبیق له لارې معیاري ښوونیزه زمینه برابره کړي او د پوهنې تدریسي او تعلیمي نصاب د کمپیوټر په ذریعه بشپړ او پرلیکه زده کړو زمینه برابره کړي.