د دولتي ادارو د ډیجیټل کولو کمیسیون د کاري ډلې دوهمه ناسته ترسره شوه

د حکومتي ادارو د ډیجیټل کولو کمیسیون دوهمه ناسته د همکاریو راجلبولو او پدې برخه کې د بریالیونړیوالو شرکتونو تجربې شریکولو په اړه د هیواد د ولسمشر د فرمان تعقیبولو په منظور جوړه شوه.
په دې ناسته کې د ولسمشرۍ د چارو ادارې د پانګوونې اسانتیا واحد رییس عطاء الله نصیب، د مخابراتو او معلوماتي ټکنالوجۍ وزیرې معصومه خاوري، د مرکزي احصائیې رییس احمد جاوید رسولي، د اترا ادارې رییس عمر منصور انصاري، د ملي راډیو او ټلویزیون عمومي رییس اسماعیل میاخیل، د مالیې وزارت استازی، متحده عربي اماراتو کې د افغانستان سفیر جاوید احمد  او په دې برخه کې تجربه لرونکو یو شمیر نړیوالو شرکتونو استازو ګډون درلود.
د ناستې په پیل کې، د چارو ادارې د پانګوونې اسانتیا واحد رئیس ښاغلي عطاء الله نصیب د دولتي ادارو ډیجیټل کولو او په دې برخه د بریالۍ نړیوالې تجربې کارولو په اړه د هیواد د ولسمشر د فرمان او لید په هکله بحث وکړ.

د مخابراتو او معلوماتي ټکنالوجۍ وزیرې معصومه خاوري او د کمیسیون نورو غړو د ولسمشر پر لارښوونه او د هیواد د موجوده سیستمونو د قوت او په کمزورو برخو خبرې وکړې.
د غونډې په پای کې، پریکړه وشوه چې د کمیسیون غړي دې له هغه شرکتونو سره ویډیو کنفرانس جوړ کړي چې پدې برخه کې تجربه لري  او په هیواد کې د موجوده سیسټمونو اوسني حالت تعریف او له ولسمشر سره یې شریک کړي.